Yanvarın 29-da Azərbaycanda bələdiyyə seçkiləri keçiriləcək. Bələdiyyə seçkilərində 16 mindən çox namizəd mübarizə aparacaq. Ən yaşlı qadın namizəd isə bir çoxumuzun yaxşı tanıdığı Sosialist Əməyi Qəhrəmanı, I dərəcəli "Əmək" ordeni laureatı Fatma Hüseynovadır.

Onun namizədliyi hakim Yeni Azərbaycan Partiyası (YAP) tərəfindən irəli sürülüb. Fatma nənə 68 saylı Sabirabad-Şirvan seçki dairəsində Qaaratəpə bələdiyyəsi üzrə namizəddir.

Modern.az Fatma Hüseynova ilə həmsöhbət olub.

O bildirib ki, bələdiyyə seçkilərində namizəd olmağına səbəb xalqın israr etməsidir:

“İndidən nə işlər görəcəyimizi demək üçün tezdir. Mən illərlə xalqım, dövlətim üçün çalışmışam. Amma artıq birləşmiş bələdiyyələrlə əvvəlkindən daha böyük bələdiyyə yaradılıb. Buna görə də görüləcək işlər də daha çoxdur. Ona görə də hələ bu bələdiyyədə vəziyyətin necə olacağını deyə bilmərəm. Amma öz kəndimə qalsaydı, xalqıma xidmət yolunda hər şeyi etməyə hazır idim”.

Müsahibimiz bildirib ki, namizəd olduğu bələdiyyə üzrə digər namizədlərin əksəriyyəti gənclərdir:

“Onlarla tez-tez görüşlər keçiririk. Onlara xalqıma olan xidmətlərimdən, gördüyüm işlərdən danışıram. Xalqla necə işləməyi, əldə edilən vəsaiti xalq yolunda necə işlətməyi, hansı işlərin görülməsinin vacib olduğunu, imkansız ailələrə yardım edilməsinin vacibliyini onlara başa salıram. Gənc vaxtımdan gördüyüm işlər üçün indi də dövlət məndən əl çəkmir. Onlara da bunu məsləhət görürəm. Məsləhət görürəm ki, xalqımıza, dövlətimizə, rəhbərimizə layiqincə xidmət etsinlər”.

Qeyd edək ki, Fatma Hüseynova 1939-cu ildə Sabirabadın Abdulyan kəndində anadan olub. O, Azərbaycan SSR Ali Sovetinin (IX çağırış, XI çağırış), SSRİ Ali Sovetinin (X çağırış) deputatı olub.

17 sentyabr 2016-cı ildə Azərbaycan Respublikasının prezidenti İlham Əliyev Sabirabad pambıqçıları, o cümlədən Fatma Hüseynova ilə görüşüb.

2017-ci ildə 1-ci dərəcəli "Əmək" ordeni ilə təltif olunub.