Azərbaycanın xarici işlər naziri Ceyhun Bayramov ötən gün keçirilən mətbuat konfransında ABŞ-nin Beynəlxalq İnkişaf Agentliyinin (USIAD) yardımları xoşniyyətli olmadığını bildirib.
C. Bayramov qeyd edib ki, USAID-in ölkəmizə yardımları ABŞ-ın mənafeyi üçün edilirdi: "Buna görə də biz ABŞ ilə sazişlərə xitam verilməsini, USAID-in layihələrinin dayandırılmasını tələb etdik. Onlar isə bunun dayandırılmasını istəmirdilər. Ona görə də biz bundan sonra yazılı təkliflərimizi ABŞ tərəfinə göndərdik və müzakirələr aparıldı".
Nazirin sözlərinə görə, USAID-in fəaliyyəti 2024-cü il iyunun 1-dən etibarən de-yure dayandırılıb: "Onların (USIAD) fəaliyyətinin tam olaraq dayandırılmasının vaxtı yetişib".
Məsələ ilə bağlı Modern.az-a danışan Milli Məclisin İqtisadi siyasət, sənayev və sahibkarlıq komitəsinin üzvü Vüqar Bayramov bildirib ki, USIAD rəhbərinin Ermənistana mütəmadi səfərləri, Azərbaycana qarşı səsləndirdiyi qərəzli bəyanatlar bu qurumun kifayət qədər qərəzli və birtərəfli mövqe tutduğunu açıq göstərib:
“Azərbaycan ancaq beynəlxalq hüquq prinsiplərinə üstünlük verən təşkilat və fondlarla əməkdaşlıq edir. Son illər USİAD rəhbərinin çıxışlarına, bizə qarşı bəyanatlarına, baş verən məsələlərin birtətərfli və qərəzli şəkildə siyasiləşdirilməsini nəzərə alsaq, Azərbaycanın sözügedən qurumla əməkdaşlığa yenidən baxması, bu kontekstdən beynəlxalq hüquq və ölkələrin ərazi bütövlüyünə hörmət edən təşkilatlarla əməkdaşlıq etməsi vacib idi. Bu istiqamətdə verilən qərar düzgündür və Azərbaycanın milli maraqlarına uyğundur. Azərbaycan beynəlxalq təşkilatlarla əlaqələr qurarkən milli maraqlarını prioritet götürür. Bundan sonra da bu prinsip əsas götürüləcək”.
İqtisadçı ekspert Eldəniz Əmirov isə söyləyib ki, kapitalist dünyada humanitar yardımlar artırsa, deməli bunun arxasında müəyyən maraqlar dayanır:
“İstənilən böyük təşkilat bütün ölkələrdə fəaliyyətlərini həmin təşkilatın təsisçilərinin maraqlarına uyğun qurur. Bunu bütün beynəlxalq təşkilatlara şamil etmək olar. Sadəcə olaraq təşkilatların bəzilərində bu daha çox özünü büruzə verir. USIAD Azərbaycanda bir çox layihələr icra edib. ABŞ təşkilatı olduğu üçün USIAD-in bu ölkənin maraqlarını bizim ölkəmizdə icrası ilə məşğul olduğuna heç də şübhə etmirəm. Görünür ki, artıq müəyyən siyasi səbəblərdən ötrü Ceyhun Bayramovun dediyi nəticələr meydana gəlib. USIAD ABŞ-nin beynəlxalq inkişaf və yardım agentliyidir. Amma birmənalı olaraq kapitalist dünyada humanitar yardımın artmasının arxasında hər zaman maraqlar dayanır. Bu tək ABŞ və USIAD üçün xarakterik deyil. Bütün ölkələrin addımlarının arxasında öz maraqları dayanır. Bu təşkilatın əsas missiyası iqtisadi cəhətdən inkişafı, ticarəti dətəkləməkdir. Demokratiya və insan hüquqlarını, təhsili, səhiyyəni dəstəkləməkdir. Bu strategiya üzərində dünyanın 100-dən çox ölkəsində hazırda fəaliyyət göstərən bir təşkilatdır. Təbii ki, müəyyən siyasi səbəblərdən belə təcrübələr olub ki, müxtəlif ölkələr USIAD-in fəaliyyətini öz sərhədləri daxilində məhdudlaşıdrıblar”.
