Bakıdakı "Hilton" otelində Prezident Administrasiyasının təşkilatçılığı ilə “Suverenliyin bərpası: siyasi müstəvidə yeni münasibətlər sisteminin formalaşdırılması” mövzusunda dəyirmi masa keçirilib. Dəyirmi masada ölkədə fəaliyyət göstərən 26 siyasi partiyadan 24-nün (Müsavat və AXCP-dən başqa) nümayəndələri, həmçinin politoloqlar, siyasi şərhçilər, KİV təmsilçiləri iştirak ediblər.

Siyasi partiya təmsilçiləri və digər tədbir iştirakçıları çıxış ediblər.Dəyirmi masada iştirak edən REAL Partiyasının sədri Natiq Cəfərli Modern.az-a açıqlamasında bildirib ki, bu tip görüşlərdə konkret məsələlərin müzakirə edilməsinin məqsədəuyğun olacağını düşünür: “Ümumilikdə, belə görüşlərin təşkil olunması çox pozitivdir. Bu dövlət qurumları ilə siyasi partiyalar arasında sağlam münasibətlərin inkişaf etməsinə səbəb olur, amma arzumuz, istəyimiz ondan ibarətdir ki, konkret məsələlər üzrə də müzakirələr təşkil olunsun. Bu, kifayət qədər effekt verə bilər. Məsələn, təhsil siyasəti, iqtisadi, sosial siyasət, mədəni siyasət və sair. Öz çıxışımda da bu bunu diqqətə çatdırdım”.

O qeyd edib ki, görüş zamanı referendumla bağlı iqidar tərəfindən anons verilməyib:

"Biz istəyirik ki, referendum olsun. Lakin ötən gün keçirilən dəyirmi masada referendumla bağlı konkret bir söhbət olmadı. Ən azından iqtidar nümayəndələri tərəfindən referendum anonsuna bənzər bir şey verilmədi".