Qondarma “DQR naziri”: “Minsk Qrupu işğal olunduğu iddia edilən ərazilərin Azərbaycana məxsus olduğunu qəbul edirlər
Bu ilin sonuna qədər Dağlıq Qarabağ probleminin həlli ilə bağlı “yol xəritəsi” imzalanacaq. Bu sensasiyaslı xəbəri qondarma Dağlıq Qarabağdakı separatçı rejimin “xarici işlər naziri” Arman Melikyan bu gün İrəvanda keçirdiyi mətbuat konfransında bəyan edib.
Melikyan bildirib ki, Minsk Qrupunun qiymətləndirmə missiyasının işğal olunmuş torpaqlara sonuncu səfərində ən vacib nüans kimi bu tərkibə BMT-nin qaçqınlar üzrə ali komissarının nümayəndəsinin qoşulması olub. Onun sözlərinə görə, bu onu göstərir ki, Minsk Qrupu bu əraziləri “Azərbaycana məxsus olduğunu” qəbul edirlər. Bununla bağlı o deyib ki, qaçqınlar üzrə nümayəndənin tərkibdə olması onu göstərir ki, missiyanın məqsədi situasiyanı qiymətləndirmək və azərbaycanlı köçkünlərin yaşadıqları yerə qayıtmaları üçün imkanları öyrənmək olub.
Melikyan bildirib ki, Minsk Qrupunun bunun ardınca “işğal olunmuş” ərazilərlə bağlı vəziyyətə yekun qiyməti və burada azərbaycanlıların məskunlaşması ilə bağlı mövqeləri hazırladıqları hesabatda əksini tapacaq.
Yeri gəlmişkən, bu arada BMT-nin Baş katibi Pan Gi Mun bəyan edib ki, BMT Dağlıq Qarabağ münaqişəsinin sülh yolu ilə həll edilməsi istiqamətində öz töhfəsini verməyə hazırdır.
