Bu günlərdə Ermənistanla ABŞ arasında imzalanan strateji tərəfdaşlıq haqqında xartiya Ermənistanın çox təhlükəli oyunlarda alət kimi istifadə olunduğunu bir daha təsdiqlədi. Xarici işlər naziri Ararat Mirzoyan və ABŞ dövlət katibi Entoni Blinken arasında imzalanan sənəd Ermənistanı Rusiyanın təsiri altından çıxarmağa, regionda ABŞ-nin bu regionda təsir rıçaqlarını möhkəmləndirməyə hesablanıb.
Milli Məclisin deputatı Nigar Məmmədova Modern.az-a açıqlamasında bildirib ki, sənədin Ermənistanın müdafiə sisteminin modernləşdirilməsini və suverenliyin qorunması üçün lazımi alətlərin təmin edilməsini nəzərdə tutması açıq şəkildə Ermənistanı revanşa həvəsləndirməkdir.
Deputatın sözlərinə görə, yenə də “Dağlıq Qarabağ” ifadəsinin işlədilməsi Bayden administrasiyasının, dövlət katibi E.Blinkenin bu günə kimi bütün dünya üzrə həyata keçirdiyi destruktiv siyasətin növbəti təzahürüdür. Cənab Prezidentin də qeyd etdiyi kimi, “Bayden administrasiyasının Azərbaycanla bağlı əsas səhvi ondan ibarət idi ki, o, Amerika-Azərbaycan münasibətlərini Amerika-Ermənistan münasibətlərinin qurbanına çevirdi”.
Postunu təhvil verdiyi bir vaxtda belə bir sənədin imzalanması açıq şəkildə Vaşinqtonun dünyanın müxtəlif bölgələrində maraq və mənafelərinə zərbə vurmaq deməkdir. Son 5 ildə dünyada münaqişə və fəlakət ocaqlarını daha da qızışdıran Bayden administrasiyasının dağıdıcı siyasətinin nəticəsidir ki, dünya xalqları ABŞ-a inanmır.
Yeri gəlmişkən, məhz Blinkenin riyakarlığı ABŞ-nin Azərbaycan və Ermənistan arasında danışıqlardan uzaqlaşdırılması ilə nəticələndi. İşğal dövründə təcavüzkarla təcavüzə məruz qalan arasında fərq qoymayan ABŞ post münaqişə dövründə də ikili standartlar siyasətini davam etdirdi. Regionda sülhün deyil, yeni münaqişə ocağının yaranması istiqamətində əlindən gələni etdi. Ermənistanla yanaşı hətta Gürcüstanı da plasdarma çevirməyə çalışdı.
Deputat əlavə edib ki, Azərbaycan və Ermənistan sərhədinə “Avropa İttifaqının mülki missiyası” adı altında yerləşdirilən təxribatçı missiyanın da müəllifi Bayden Administrasiyasıdır.
Azərbaycan haqlı olaraq Avropa İttifaqının dırnaqarası mülki missiyasının sərhəddə yerləşməsinin əleyhinədir. Dövlət başçımız da bəyan edib ki, sözdə Avropa müşahidəçiləri pərdəsi altında bizimlə Ermənistan sərhədində NATO tərəfindən infrastruktur yaradılıb. Məlumdur ki, həmin missiya sərhəddə kəşfiyyat məqsədi ilə fəaliyyət göstərir və təxribatlar törədir. Missiyanın tərkibi Azərbaycanın razılığı olmadan genişlənir. Ümumiyyətlə, Ermənistan anlamalıdır ki, bu missiyanın fəaliyyəti sülh prosesinə zərbə vurur. Rəsmi Bakı dəfələrlə bəyan edib ki, üçüncü qüvvənin iki ölkənin sərhədində olması vəziyyətin gərginləşdirilməsinə, Avropa İttifaqının bütövlükdə Cənubi Qafqazda hərbi amil kimi meydana çıxmasına xidmət edir.
Sonda Nigar Məmmədova qeyd edib ki, bütün bu gərginliklər fonunda yeni Prezident Trampın dövründə Azərbaycan-ABŞ münasibətlərinin normallaşmasına ümidlər var. Belə ki, Prezident İlham Əliyev bu günlərdə yerli telekanallara müsahibəsində də bəyan etdi ki, “Tramp bizim cəmiyyətimizin bölüşdüyü dəyərləri təbliğ edir. Ona görə ümidlər böyükdür. Əgər hər iki tərəf maraqlı olsa, biz Amerika-Azərbaycan əlaqələrini strateji səviyyəyə qaldıra bilərik”.
