İlham Əliyev müstəqil Azərbaycan Respublikasının prezidentləri arasında Güney Azərbaycanın Təbriz şəhərinə səfər etmiş ilk dövlət başçısı olub. Bu, İlham Əliyevin ilk dəfə (2003-cü il) Azərbaycan Respublikasının Prezidenti seçiləndən sonra, 2005-ci ilin 24-26 yanvar tarixində İrana səfəri çərçivəsində baş tutub.
Modern.az saytının “Bir şəklin tarixçəsi” rubrikasında təqdim etdiyi bu foto İlham Əliyevin Prezident kimi İran İslam Respublikasına ilk səfəri zamanı çəkilib.
Zaman 2005-ci ilin yanvarı... Məkan Tehran şəhəri...
Azərbaycan-İran arasında ikitərəfli əlaqələrin inkişafı istiqamətində sənədlərin imzalanma mərasimi...
Azərbaycan Prezidenti İlham Əliyevlə İran Prezidnti Məhəmməd Xatəminin iştirak etdiyi mərasimdə iki ölkə arasında müxtəlif sahələr dair 10 sənəd imzalanır.
Bu mərasimdə İranın hazırkı Prezidenti Məsud Pezeşkianı da görmək olar. Həmin vaxt o, İranın səhiyyə naziri vəzifəsində çalışırdı. Şəkildə Məsud Pezeşkian ayaq üstə duranların sırasında soldan 6-cıdır.
O vaxt Azərbaycan Prezidenti Tehran görüşlərini başa vurandan sonra, yanvarın 26-da Təbriz şəhərinə getmişdi. İlham Əliyevi Təbrizdə böyük hörmətlə, gül-çiçəklə qarşılanmışdı. Prezidenti Təbriz səfərində İranın kooperasiya naziri Əli Sufi, xarici işlər nazirinin müavini Möhsün Əminzadə, İran Prezidentinin Xəzər məsələləri üzrə xüsusi nümayəndəsi Mehdi Səfəri, Azərbaycanın Tehrandakı səfiri Abbasəli Həsənov və İranın Bakıdakı səfiri Əfşar Süleymani müşayiət etmişdilər.
Şərqi Azərbaycan əyalətinin o vaxtkı valisi Məhəmmədəli Sübhanullahi Prezident İlham Əliyevi Təbrizə gəlməsi müasibətilə təbrik edərək, bunu tarixi hadisə kimi qiymətləndirmişdi. Məhəmmədəli Sübhanullahi görüşdə çıxış edərkən İran Prezidenti Məhəmməd Xatəmiyə Təbrizdə Azərbaycanın Baş konsulluğunun açılmasına razılıq verdiyinə görə təşəkkür etmişdi.
Təbirdə çıxış edən Prezident İlham Əliyev tarixi Azərbaycan şəhirində olmaqdan məmnunluq hissi keçirdiyini vurğulamışdı.
“Çox şadam ki, bu gün Təbrizdəyəm. Çoxdan Təbrizə gəlmək arzusunda idim. Bu gün bu arzum gerçəkləşdi. Təbriz bizim hamımız üçün doğma, əziz şəhərdir. Burada Azərbaycanın Baş Konsulluğunun açılması çox mühüm addımdır və çox gözəl hadisədir. Bütün bu son müddət ərzində ikitərəfli müstəvidə qazanılmış uğurlar onu göstərir ki, bir az iradə, xoş niyyət olan yerdə bütün məsələlər öz həllini tapa bilər. Əminəm ki, bizim aramızda olan münasibətlər gələcək illərdə daha da inkişaf edəcəkdir”, - deyə İlham Əliyev qeyd etmişdi.
Ə.Qafarlı
