Təhsili davam etdirməyə görə ümumi möhlət verilənlərin 60 faizi Türkiyədə təhsil alırlar.
Modern.az xəbər verir ki, bunu Səfərbərlik və Hərbi Xidmətə Çağırış üzrə Dövlət Xidmətinin Həqiqi hərbi xidmətə çağırış baş idarəsinin rəisi Azər Babayev Milli Məclisin Müdafiə, təhlükəsizlik və korrupsiya ilə mübarizə komitəsinin iclasında “Hərbi vəzifə və hərbi xidmət haqqında” qanuna təklif edilən dəyişikliklərin müzakirəsi zamanı deyib.
“Bizim bazada son statistikaya əsasən, ümumi möhlət verilənlərdən 60 %-i Türkiyədə, 11,8%-i Rusiyada, 6,8%-i Polşada, 6%-i Ukraynada, 2,6%-i Almaniyada, 2%-i Gürcüstanda, 1,6%-i ABŞ-da, 1,3%-i Böyük Britaniyada təhsil almağa gedib. Digər ölkələr 1 %-dən aşağıdır. İki ilin statistikasına görə, Kütahya Dumlupınar Üniversitesi təhsilə görə gətirilən arayışların sayına görə 1-ci yerdə olub. 2023-cü ildə isə 1-ci yerdə Gümüşhanə Universiteti qərarlaşıb. Mən də çox istəyərdim ki, yaxşı universitetlərdə oxusunlar, amma statistika belədir. Yaxşı universitetlərə təhsil almağa gedənlərin sayı çox azdır”.
