29 oktyabr Cümhuriyyət bayramı münasibəti ilə Türkiyənin Bakıdakı səfiri İsmail Alper Coşqun başda olmaqla Türkiyədən gələn qonaqlar, Azərbaycandan olan nümayəndələrin iştirakı ilə Şəhidlər xiyabanındakı cümhuriyət abidəsini ziyarət ediblər. Modern.az xəbər verir ki, daha sonra Türkiyə səfiri Azərbaycan şəhidlərini ziyarət edərək, məşəlin önünə əkilik qoyub.
“ Noyabr ayında həyata keçiriləcək G20-likdə (Böyük 20-lik) Azərbaycan da iştirak edəcək”. Türkiyənin Azərbaycandakı səfiri Alper Coşqun media mənsublarının suallarını cavablandırarkən belə deyib.
O, əlavə edib ki, Azərbaycan maliyyə, enerji və bu kimi toplantılarda hər zaman iştirak edib. “Antalyada noyabr ayında həyata keçiriləcək G20-likdə Azərbaycan da iştirak edəcək.”
Alper Coşqun həmçinin parlament seçkilərindən də danışıb. Səfir qeyd edib ki, bu, xoş bir təsadüfdür ki, Azərbaycanda və Türkiyədə parlament seçkiləri eyni gündə gercəkləşdiriləcək.
“Türkiyəli vətəndaşların Azərbaycanda səsverməsi yekunlaşdırılır. Mən istəyirəm ki, noyabrın 1-də keçiriləcək seçkilər hüzur və barış içində bitsin. Seçkilərdə nəticəni əvvəlcədən bilmək mümkün deyil. Amma qəti olan odur ki, seçkilərdə nəticə nə olursa olsun, Azərbaycan və Türkiyə arasında qardaşlıq hər zaman daimi sürəcək”.
Rusiyanın Suriyada həyata keçirdiyi hərbi əməliyyatları şərh edən Alper Coşqun fikirlərini bu cür ifadə edib: “Rusiya bizim üçün vacib ölkələrdən biridir. Və bir problem ortaya çıxdığında o problemin həlli yolunda iştirak etməsini istədiyimiz bir ölkədir. Amma hər yerdə biz birlikdə deyilik. Türkiyənin öz maraqları , Rusiyanın isə öz maraqları var. Rusiyanın Suriya da keçirdiyi tədbirlər oradakı problemləri ortadan qaldıracaq bacarıqda deyil. Rusiyanın orada keçirdiyi hərbi hərəkata baxdığımızda terror təşkilatını hədəfə aldıqlarını desələr də, açıq şəkildə görürük ki, Əsəd rejiminin güclənməsinə xidmət edirlər və müxalifəti məhv etmək istəyirlər”.
Emil Rasim
Ağa Akifoğlu
