"Bütün cəhdlərə baxmayaraq, əfsuslar olsun ki, SOCAR-ın “Günəşli” yatağındakı 10-cu dərin dəniz özülündə baş verən yanğın nəticəsində itkin düşən 29 nəfəri hələ də tapmaq tapmaq mümkün olmayıb. Bir müddət öncə dənizdə olan qərargahımızla danışdım. SOCAR-ın prezidenti Rövnəq Abdullayev özü də qərargahdadır. Əsas xilasetmə işləri ilə Sərhəd Xidmətinin 7 gəmisi və 4 helikopteri, Fövqəladə Hallar Nazirliyinin 4 helikopteri, “Xəzər Dəniz Gəmiçiliyi” QSC-nin ərazidə işləyən bütün gəmiləri məşğuldur". Modern.az saytı xəbər verir ki, bunu SOCAR-ın vitse-prezidenti Xaik Məmmədov yaradılan operativ qərargahda keçirilən son brifinqdə bildirib.
"Dənizin üzərində gödəkçələr tapılıb. Xilasedicilər həmin əşyaları götürdü. Bununla yanaşı, suyun üzərində xilasetmə qayığının sınan bir hissəsi aşkarlanıb. Əfsuslar olsun ki, itkin düşən əməkdaşlamızdan tapılan olmayıb", - deyə X. Məmmədov bildirib.
O əlavə edib ki, platformadakı yanğın söndürülüb, lakin qaz quyusundakı yanğını söndürmək mümkün olmayıb: “Bilirsiniz ki, bizim əməkdaşlarımız artıq özülün üzərinə qalxa bilib. Qiymətləndirmə işləri aparılıb, müvafiq işlər görülüb”. Onun sözlərinə görə, axtarış tədbirləri davam edir.
X. Məmmədov qeyd edib ki, yanğından sonra təxliyyə olunan 8 nəfər xəsəxanadadır, 22-si isə xəstəxanadan buraxılıb: "Buraxılan 1 nəfər geri qayıdıb. Səhhətində problem yaranıb. Ümumən, həkimlər xəstələrin səhhətini normal qiymətləndirir. Hesab edirik ki, yaxın müddət ərzində digər zərərçəkənlər də evlərinə buraxılacaq".
Vitse-prezident əlavə edib ki, dekabrın 4-də saat 12:30 radələrində “Neft Daşları” NQÇİ-nin 501 nömrəli özülündə baş verən qəza nəticəsində itkin düşən 3 neftçinin də axtarışı davam edir.
X.Məmmədov bildirib ki, "Günəşli" yatağındakı 10-cu dərin dəniz özülündə baş verən yanğın nəticəsində itkin düşən 29 nəfərin yaxınlarının qayğılarını qarşılamaq üçün SOCAR-ın müxtəlif strukturlarında müvafiq qruplar yaradılıb.
"Bütün işləri SOCAR-ın vitse-prezidenti Bədəl Bədəlov koordinasiya edir. Yaradılan qruplarda iştirak edən əməkdaşlarımız itkin düşənlərin yaxınları ilə mütəmadi əlaqə saxlayaraq, onların problemləri ilə maraqlanır, axtarış tədbirləri barədə lazımi informasiyanı çatdırır. Təbii ki, xəstəxanada olan əməkdaşlarımız da diqqətdən kənarda qalmayıb, onlarla da mütəmadi əlaqə saxlanılır. Bilirsiniz ki, ölkə başçısının imzaladığı sərəncama əsasən həmin ailələrə müvafiq maddi yardımın edilməsi nəzərdə tutulub. Təbii ki, maddi yardım göstəriləcək", - deyə X. Məmmədov bildirib
Qeyd edək ki, operativ qərargahda hər 3 saatdanbir KİV üçün brifinq keçirilir. Brifinqdə itkin düşən neftçilərin tapılması istiqamətində aparılan axtarış təbdirlərinin nəticələri, o cümlədən platformadakı yanğının söndürülməsi ilə bağlı son məlumatlar açıqlanır.
Modern.az
