Gənc müğənni Elvin Ramazan oğlu Quliyev (Elvin Ordubadlı) intihar edib. Modern.az saytı xəbər verir ki, hadisə Bakıxanov qəsəbəsində baş verib.
Sabunçu rayon Polis İdarəsindən verilən məlumata görə, 1989-cu il təvəllüdlü Elvin Ramazan oğlu Quliyev Bakıxanov qəsəbəsi, Y. Əliyev küçəsi 1 saylı binanın 23-cü mənzilinin balkonundan özünü yerə atıb. Həmin mənzil müğənninin yaşadığı ev olub. Ağır vəziyyətdə Sabunçudakı 3 saylı Şəhər Klinik Xəstəxanasına aparılan E.Quliyev orada ölüb.
Faktla bağlı Sabunçu rayon Prokurorluğunda Cinayət Məcəlləsinin 125-ci (Özünü öldürmə həddinə çatdırma) maddəsilə cinayət işi başlanıb. İntiharın səbəbləri araşdırılır.
Elvin Quliyev "Azərbaycanın səsi" musiqi yarışmasının qalibi olub. O, Azərbaycanı 2014-cü ildə "Türkvision" mahnı yarışmasında da təmsil edib.
Aytən Zəhra
