Almaniyanın sabiq kansleri Angela Merkel ölkənin növbəti federal prezidenti postuna namizəd olacağı barədə xəbərlər yayılıb.
Modern.az xəbər verir ki, onun ofisi yayılan iddiaları təkzib edib.
Onun ofisi mətbuatda yer alan məlumatları “absurd” adlandırıb, Merkelin bu vəzifəyə namizədliyini qəti şəkildə istisna edib.
Açıqlama gələn il hazırkı prezident Frank-Valter Ştaynmayerin səlahiyyət müddətinin başa çatması ərəfəsində siyasi partiyaların mümkün namizədlər üzərində müzakirələr apardığı bir vaxtda verilib. Ştaynmayer 18 mart 2027-ci ildə ikinci müddətini tamamlayacaq və konstitusiyaya əsasən yenidən namizəd ola bilməz.
“Tagesspiegel” qəzetinin sorğusuna cavab olaraq Merkelin ofisinin sözçüsü yayılan xəbərləri “absurd” adlandırıb. Almaniyanın dpa agentliyinə isə sözçü birbaşa “xeyr” cavabını verib.
İddialar “Bild” qəzetinin Xristian Demokratlar Partiyası daxilində Yaşılların Merkelin namizədliyini irəli sürə biləcəyi barədə şayiələrin dolaşdığını yazmasından sonra gündəmə gəlib. Lakin Yaşıllar Partiyası da bu məlumatları təkzib edib. Partiyanın parlamentdəki həmsədri Britta Hasselmann bildirib ki, federal prezident seçkisi ilə bağlı partiya daxilində heç bir qərar və ya müzakirə aparılmayıb.
Almaniyada federal prezident Bundestaq deputatları və əyalət parlamentlərinin nümayəndələrindən ibarət Federal Konvent tərəfindən seçilir. Prezident postu əsasən simvolik xarakter daşısa da, ölkəni beynəlxalq səviyyədə təmsil edir və mənəvi nüfuza malikdir.
Merkel 2021-ci ildə kansler vəzifəsindən ayrıldıqdan sonra aktiv siyasətdən uzaqlaşıb və əsasən şəxsi həyatına və “Freiheit” adlı xatirə kitabının yazılmasına fokuslanıb.
