Özbəkistan prezidenti Şavkat Mirziyoyev oktyabrın 5-də Rusiyaya səfər edəcək.
Modern.az xəbər verir ki, bu barədə Özbəkistan prezidentinin mətbuat xidməti məlumat yayıb.
Bildirilir ki, səfər oktyabrın 7-dək davam edəcək. O, Moskvada Rusiya prezidenti Vladimir Putinlə danışıqlar aparacaq.
Mirziyoyev Rusiyanın baş naziri Mixail Mişustinlə də görüşəcək. Görüşlərdə ikitərəfli əlaqələrin dərinləşdirilməsi müzakirə olunacaq, ticarət-iqtisadi, investisiya, miqrasiya və humanitar sahələrdə əməkdaşlığın genişləndirilməsinə xüsusi diqqət yetiriləcək.
Səfər çərçivəsində Özbəkistan prezidenti Tatarıstana da səfər edəcək. Burada o, respublika rəhbəri Rüstəm Minnixanovla danışıqlar aparacaq.
