Finlandiya Prezidenti Aleksandr Stubb Rusiya və Prezident Vladimir Putinlə mümkün dialoqda Avropanın nümayəndəsi roluna ehtimal olunan namizəd kimi nəzərdən keçirilir.
Modern.az xarici KİV-ə istinadla bildirir ki, Stubb üç mühüm meyara cavab verir. Bunlardan biri onun ABŞ Prezidenti Donald Trampla uzun müddətdir davam edən yaxşı münasibətləridir.
2025-ci ilin martında Tramp və Stubb ikitərəfli münasibətləri və Ukrayna məsələsini müzakirə etmək üçün Floridada görüşüblər. Onlar birlikdə səhər yeməyi yeyib qolf oynayıblar. Diplomatik mənbələr də iki siyasətçi arasındakı münasibətləri Aİ liderləri arasında ən yaxşı münasibətlərdən biri kimi qiymətləndiriblər.
Qeyd olunur ki, bu əlaqələr Avropa təhlükəsizliyi ilə bağlı maraqların Vaşinqtonda irəli aparılmasına, həmçinin Tramp, Zelenski və Avropalı müttəfiqlər arasında anlaşılmazlıqların azaldılmasına kömək edə bilər. Bununla belə, şəxsi yaxınlıq özlüyündə siyasi güzəştlərə zəmanət vermir.
Stubb bir neçə gün əvvəl Osloda Ukrayna Prezidenti Vladimir Zelenski və ABŞ liderinin xüsusi nümayəndəsi Stiv Uitkoffla danışıqlarda iştirak edib.
Bu əlaqələrinə görə, onun Ukrayna rəhbərliyinin və Amerika tərəfinin hazırkı mövqeləri ilə birbaşa tanış olmasına ümid edilir. Məlumatda vurğulanıb ki, vasitəçi üçün bu, dəyərli başlanğıc mövqeyidir.
Xarici mediada yer alan xəbərə görə, Finlandiya Prezidenti üç mühüm xüsusiyyəti özündə birləşdirir: Trampla yaxşı əlaqələr, Rusiya ilə işləmək sahəsində birbaşa təcrübə və Ukrayna rəhbərliyinə çıxış imkanları.
Bu rola təyin olunacağı təqdirdə, onun əsas vəzifəsi sadəcə Rusiya ilə Ukrayna arasında kompromisə nail olmaq deyil, həm də “mümkün sülh nizamlanması zamanı Avropanın kənarda saxlanılmamasını təmin etmək”dir.
Aleksandr Stubb
Rusiya xarici işlər nazirinin müavini Aleksandr Qruşko bildirib ki, danışıqlar aparacaq şəxsin kimliyi Moskva üçün prinsipial əhəmiyyət daşımır:
“Bu, hətta ikinci dərəcəli və ya üçüncü dərəcəli məsələ də deyil, prinsipial əhəmiyyəti yoxdur. Əlbəttə, Vladimir Putin kifayət qədər aydın səbəblərə görə kimin həqiqətən müsbət rol oynaya biləcəyini artıq qeyd edib. Lakin əsas məsələ Avropa İttifaqı həmin şəxsin danışıqlara qatılmasına icazə verərsə, onun bu danışıqlara hansı mövqe ilə gələcəyidir”.
“Telegraph” Rusiyayla danışıqlar aparmaq üçün beş Avropa namizədinin adını açıqlayıb
Namizədlər sırasında İtaliyanın Baş naziri Corcia Meloni, Finlandiya Prezidenti Aleksandr Stubb, Çexiya Prezidenti Petr Pavel, Norveçin Baş naziri Yonas Qar Störe və Danimarkanın Baş naziri Mette Frederiksen göstərilir.
Məlumata görə, Avropa paytaxtlarında Rusiya ilə dialoqun zəruriliyi barədə müzakirələr son aylarda intensivləşib. Buna səbəb Aİ ölkələrinin liderlərinin ABŞ Prezidentinin onların maraqlarını təmsil etmədiyini düşünməsidir.
Mənbələrdən birinin məlumatına görə, Avropa belə bir qənaətə gəlib ki, ilk növbədə ruslarla danışıqlar aparmağın zəruriliyi barədə konsensus əldə edilməlidir.
Digər bir mənbə isə ölkələr arasında rəqabətin qarşısını almaq üçün çox güman ki, danışıqlarda bir qrup dövlət başçısının iştirak edəcəyini qeyd edib.
Öz növbəsində, Rusiya Prezidenti Vladimir Putinin mətbuat katibi Dmitri Peskov Ukrayna ilə bağlı danışıqlarda Avropa İttifaqının xüsusi nümayəndəsinin iştirakının mənasının Brüsselin mövqeyindən asılı olduğunu bildirib.
Putin isə Avropanın nümayəndəsinin namizədliyinin Xarici İşlər Nazirliyi və ya xüsusi xidmət orqanları səviyyəsində müzakirə oluna biləcəyini deyib. Onun sözlərinə görə, bu şəxs etibar edilə bilən biri olmalıdır.
