Futbol dünyasının ən nüfuzlu fərdi mükafatlarından biri olan “Qızıl top”un 2026-cı il üzrə təqdimetmə mərasimi bu gün – oktyabrın 26-da Londonda keçiriləcək. Mükafatın 70-ci təqdimetmə mərasimi bu il həm də tarixi hadisə ilə əlamətdardır: tədbir ilk dəfə Parisdən kənarda, Böyük Britaniyanın paytaxtında təşkil olunacaq.
Modern.az xəbər verir ki, mərasim Londonun “Palladium” teatrında keçiriləcək. Tədbirin rəsmi başlanğıcı Bakı vaxtı ilə saat 21:00-a nəzərdə tutulub. Mərasimi Fransanın futbol əfsanəsi Tyerri Anri və teleaparıcı Keyt Skott aparacaqlar.
2026-cı il mükafatlandırma mərasiminin əsas intriqası kişilər arasında “Qızıl top”un qalibinin kim olacağıdır. Əsas namizədlər arasında ingiltərəli Harri Keyn, ispaniyalı Lamin Yamal və fransalı Kilian Mbappe göstərilir.
Bukmeker bazarının son məlumatlarına görə, yarışda “Bavariya”nın hücumçusu Harri Keyn öndədir. “Barselona”nın gənc ulduzu Lamin Yamal isə onun əsas rəqibi hesab olunur.
Keynin üstünlüyü mövsüm ərzində nümayiş etdirdiyi məhsuldar oyunla əlaqələndirilir. Yamal isə dünya futbolunun ən çox müzakirə olunan gənc ulduzlarından biri olaraq qalır.
Mümkün qaliblər sırasında Cud Bellinqem, Erlinq Holand, Usman Dembele, Vinisius Junior və Lionel Messinin də adları çəkilir.
Bununla belə, bukmeker əmsalları yekun nəticəni müəyyən etmir. “Qızıl top”un qalibi səsvermə yolu ilə seçilir və son qərar yalnız mükafatlandırma mərasimində bəlli olacaq.
“Qızıl top” mükafatı 1956-cı ildə “France Football” jurnalının təşəbbüsü ilə təsis edilib. Bu il keçiriləcək mərasim sayca 70-ci olacaq.
Londonun seçilməsi simvolik məna daşıyır. Belə ki, mükafatın ilk qalibi də İngiltərə futbolunun nümayəndəsi – Stenli Metyuz olub.
Xatırladaq ki, kişilər arasında 2025-ci ilin “Qızıl top” mükafatını PSJ-də çıxış edən Usman Dembele qazanıb.
