Azərbaycan Silahlı Qüvvələrinin yaradılmasının 108-ci ildönümündə ölkənin müxtəlif küçə və prospektləri hərbi orkestrlərin yürüş sədaları ilə canlanır. Bu tarixi gün bizi zaman tunelinə aparır. Xalqımız əsrlik dövlətçilik tarixində hərbi qüdrətini bəzən yalnız daxilində yaşatmalı olub, bəzən isə onu meydanlarda böyük təntənə ilə nümayiş etdirib.
Modern.az Azərbaycan ordusunun nümayiş xronologiyasına nəzər salıb.
Cümhuriyyət dövrünün ilk addımları
Azərbaycan Xalq Cümhuriyyəti (AXC) qurulduqdan sonra Bakıdakı ilk rəsmi hərbi parad 15 sentyabr 1918-ci ildə baş tutub. Nuri Paşanın rəhbərliyi ilə Bakını işğaldan qurtaran Türk-Azərbaycan qoşunları indiki "Qurd Qapısı" və Bakı Dövlət Universitetinin yerləşdiyi "Qırmızı qum" ərazilərində güc nümayişi keçiriblər.
Növbəti il 28 may 1919-cu ildə Cümhuriyyətin bir illiyi münasibətilə indiki Muzey Mərkəzinin qarşısında daha bir parad təşkil olunub. Hərbi nazir Səməd bəy Mehmandarovun qəbul etdiyi bu paradda gənc respublikanın əsgərləri müstəqillik günü münasibətilə salamlanıb.
Çok keçmədən, həmin ilin 29-30 iyul tarixlərində Hərbi nazir Səməd bəy Mehmandarov və Baş nazir Nəsib bəy Yusifbəylinin Qarabağ səfəri çərçivəsində əvvəlcə Xankəndidə, ardınca isə Şuşada yerli qoşunların hərbi paradları təşkil edilib və bu paradları hökumət başçısı şəxsən qəbul edib.
Müasir müstəqillik tariximizin ilk hərbi paradı 9 oktyabr 1992-ci ildə - Milli Ordunun yaradılmasının bir illiyində Azadlıq meydanında gerçəkləşib. Prezident Əbülfəz Elçibəyin çıxış etdiyi, dövlət rəsmilərinin qatıldığı bu paradda ölkənin o dövrdə sahib olduğu məhdud hərbi arsenal nümayiş etdirilib. Paradın ən yaddaqalan anı isə helikopterlərdən birbaşa meydana enən paraşütçü əsgərlər olub.
2008-ci il iyunun 26-da Silahlı Qüvvələrin 90 illiyində Ali Baş Komandan İlham Əliyevin rəhbərliyi ilə ikinci böyük parad keçirilib. Azadlıq meydanında 4510 nəfərlik şəxsi heyət, 210 modernləşdirilmiş texnika, həmçinin hərbi aviasiya və dəniz qüvvələri nümayiş olunub.
2011-ci il iyunun 26-da Azərbaycanın müstəqilliyinin 20, ordunun isə 93 illiyinə həsr olunan təntənəli paradda miqyas daha da böyüyüb. Prezident İlham Əliyev, birinci xanım Mehriban Əliyeva və xarici qonaqların izlədiyi bu paradda 6 min hərbçi, 400-ə yaxın texnika və silah sistemi, o cümlədən yerli istehsal olan 60-dan çox silah növü nümayiş etdirilib.
Bakıda növbəti hərbi parad 26 iyun 2013-cü ildə keçirilib. Ordunun 95 illik yubiley paradında meydandan 5 min nəfərlik heyət, 300 texnika keçib, səmada 100-dən çox təyyarə və helikopter uçub, Bakı buxtasında isə 40-a yaxın hərbi gəmi düzülüb.
2018-ci il Bakı üçün unudulmaz oldu. İyunun 26-da ordunun 100 illik yubiley paradından sonra, 15 sentyabrda Bakının azad edilməsinin əsrlik yubileyinə həsr olunmuş ikinci parad keçirildi.
Sentyabrın 15-də keçirilən ikinci paradda Azərbaycan Respublikasının Prezidenti İlham Əliyev, Türkiyə Respublikasının Prezidenti Rəcəb Tayyib Ərdoğan və Azərbaycanın birinci xanımı Mehriban Əliyeva paradda iştirak ediblər.
Vətən müharibəsindəki möhtəşəm qələbəyə həsr olunan ilk Zəfər Paradı 2020-ci il dekabrın 10-da keçirilib. Türkiyə Prezidenti Rəcəb Tayyib Ərdoğanın fəxri qonaq olduğu və general-leytenant Kərim Vəliyevin komandanlıq etdiyi paradda 3000-dən çox şəxsi heyət, 150-yə yaxın müasir hərbi texnika və ən əsası düşməndən qənimət götürülmüş hərbi texnikalar nümayiş etdirildi.
8 noyabr 2025-ci ildə İkinci Qarabağ müharibəsindəki qələbənin 5 illiyi münasibətilə Azadlıq meydanında növbəti Zəfər Paradı keçirildi. Prezident İlham Əliyev, birinci xanım Mehriban Əliyeva ilə yanaşı, Türkiyə Prezidenti Rəcəb Tayyib Ərdoğan, Pakistanın Baş naziri Şahbaz Şərif və dost ölkələrin müdafiə nazirləri tribunada yer aldılar.
Azərbaycan, Türkiyə və Pakistan rəhbərlərinin yan-yana dayanması "Üç qardaş" birliyinin simvolu kimi beynəlxalq mediada böyük rezonans doğurdu. Paradda hər üç ölkənin xüsusi təyinatlı qrupları öz bayraqları ilə keçərək regionda sabitliyin əsas dayağı olan sarsılmaz strateji müttəfiqliyi nümayiş etdirdilər.
