2025-ci ildə 1,8 milyard manata yaxın məbləğdə keçmiş illərin debitor borcları bağlanılıb.
Modern.az xəbər verir ki, bunu maliyyə naziri Sahil Babayev Milli Məclisin növbədənkənar sessiyası çərçivəsində keçirilən plenar iclasda "2025-ci il dövlət büdcəsinin icrası haqqında" qanun layihəsi ilə bağlı deputatların suallarına cavab verərkən deyib.
Nazirin sözlərinə görə, debitor borcları ilə bağlı məsələyə konseptual və kompleks yanaşılmalıdır.
O bildirib ki, 2025-ci ildə iri infrastruktur layihələri çərçivəsində qanunvericiliyin tələblərinə uyğun olaraq bağlanılmış yeni müqavilələr üzrə avans ödənişləri həyata keçirilib.
Sahil Babayev qeyd edib ki, ötən il ərzində 1 milyard 797 milyon manat məbləğində keçmiş illərin debitor borcları bağlanılıb.
Nazir əlavə edib ki, 2025-ci il ərzində təşkilatların avans qalıqları Maliyyə Nazirliyi tərəfindən təhlil olunub. Təhlilin nəticələrinə əsasən, zəruri tədbirlərin görülməsi üçün Nazirlər Kabineti tərəfindən 120 təşkilata müvafiq tapşırıqlar verilib.
