2026–2030-cu illərdə kənd təsərrüfatı, balıqçılıq və akvakultura sahələrinin inkişafı üzrə Dövlət Proqramının icrasına dövlət büdcəsindən 2 milyard manata yaxın vəsait ayrılacaq.
Modern.az xəbər verir ki, bunu maliyyə naziri Sahil Babayev Milli Məclisin növbədənkənar sessiyası çərçivəsində keçirilən plenar iclasda "2025-ci il dövlət büdcəsinin icrası haqqında" qanun layihəsi ilə bağlı deputatların suallarına cavab verərkən deyib.
Nazirin sözlərinə görə, kənd təsərrüfatı qeyri-neft sektorunun prioritet istiqamətlərindən biridir və hər il bu sahəyə dövlət büdcəsindən subsidiya, güzəşt və digər dəstək mexanizmləri vasitəsilə əhəmiyyətli maliyyə ayrılır.
Sahil Babayev bildirib ki, Azərbaycan Prezidentinin 2026-cı il 25 may tarixli sərəncamı ilə "Kənd təsərrüfatı, balıqçılıq və akvakultura sahələrinin inkişafına dair 2026–2030-cu illər üçün Dövlət Proqramı" təsdiq edilib.
Nazir qeyd edib ki, bu proqram ölkənin aqrar siyasətində yeni inkişaf mərhələsinin əsas strateji sənədlərindən biridir.
