Avropa İttifaqı (Aİ) İranda ciddi insan hüquqları pozuntularına görə daha altı fiziki şəxsə qarşı məhdudlaşdırıcı tədbirlər tətbiq edib.
Modern.az xəbər verir ki, yeni sanksiyalar çərçivəsində dini azlıqlar və siyasi fəalların, o cümlədən Nobel Sülh Mükafatı laureatı Nərgiz Məhəmmədiyə qarşı məhkəmə proseslərinə rəhbərlik etmiş İranın regional inqilab məhkəmələrinin beş hakimi siyahıya daxil edilib. Həmin hakimlərin siyasi dissidentlər və hüquq müdafiəçilərinə ölüm hökmü, uzunmüddətli həbs və digər cəzalar verdikləri qeyd olunub.
Sanksiyalar, həmçinin “Ashiyane” kiber qrupunun təsisçisi Nima Salehiyə də şamil olunub. Aİ onun hökumətə bağlı qurumlarla əməkdaşlıq edərək daxili müxalifətə və xarici təşkilatlara qarşı kiberhücumlarda iştirak etdiyi qənaətindədir.
Bununla da Aİ-nin İranla bağlı insan hüquqları sanksiyaları tətbiq olunan şəxslərin sayı 269-a, qurumların sayı isə 53-ə çatıb. Sanksiyalara aktivlərin dondurulması, Aİ-yə səfər qadağası və maliyyə resurslarının təqdim edilməsinin məhdudlaşdırılması daxildir.
