Qazaxıstan Prezidenti Kasım-Jomart Tokayev ölkənin ilk prezidenti Nursultan Nazarbayevin adının heç vaxt unudulmayacağını bildirib. O, Nazarbayevin suveren Qazaxıstanın formalaşmasında və inkişafında böyük xidmətləri olduğunu vurğulayıb.
Modern.az xəbər verir ki, Tokayev bu fikirləri Astanada Respublika Günü münasibətilə keçirilən tədbirdə səsləndirib. Bu barədə “Ak Jayık” nəşri məlumat yayıb.
“İnanıram ki, suveren Qazaxıstanın formalaşmasında, ölkəmizin son dərəcə mürəkkəb iqtisadi şəraitdə inkişafında və çoxsaylı tarixi uğurlar əldə etməsində böyük töhfəsi olan ilk prezident Nursultan Abişeviç Nazarbayevin adı heç vaxt unudulmayacaq”, – deyə Tokayev bildirib.
Onun sözlərinə görə, tarixi prosesləri qiymətləndirərkən məhz belə yanaşma ədalət prinsipinə uyğundur. Tokayev bu istiqamətə sadiqliyin nümunəsi kimi yeni siyasi partiyanın “Ədilet” adlandırılmasını da qeyd edib. Qazax dilindən tərcümədə bu söz “Ədalət” mənasını verir.
Nursultan Nazarbayev 1991–2019-cu illərdə Qazaxıstanın ilk prezidenti olub. 2022-ci ilin yanvarında ölkədə baş verən kütləvi etirazlar hökumətin istefasına və Nazarbayevin siyasətdən uzaqlaşmasına gətirib çıxarıb. O, Təhlükəsizlik Şurasının rəhbəri vəzifəsindən də gedib, hakim “Amanat” partiyasına rəhbərliyi dayandırıb. Partiya 2006–2022-ci illərdə “Nur Otan” adlanıb.
Bundan sonra Nazarbayevin yaxın ətrafından olan şəxslərin həbsləri başlayıb, ailə üzvləri dövlət vəzifələrini tərk ediblər. Daha sonra onun qardaşı oğlu Kayrat Satıbalıulı mənimsəmə və əmlaka zərər vurma işi üzrə altı il müddətinə azadlıqdan məhrum edilib. Bir müddət sonra cəza azadlığın məhdudlaşdırılması ilə əvəzlənib.
Nazarbayev isə Qazaxıstan Konstitusiyasına əsasən, keçmiş prezident kimi toxunulmazlığa malikdir.
2023-cü ilin fevralında Qazaxıstanda “Qazaxıstan Respublikasının ilk prezidenti – Elbası haqqında” qanun ləğv edilib. Bununla da Nazarbayev “Millətin lideri” statusundan və ömürlük imtiyazlarından məhrum olunub.
2026-cı ilin sentyabrında isə Tokayev xarici siyasət konsepsiyasına dəyişikliklər edib. Dəyişikliklər nəticəsində Nazarbayevin xarici siyasət məsələləri ilə bağlı vətəndaşlara və dövlət orqanlarına müraciət etmək üçün nəzərdə tutulan xüsusi ömürlük hüququ aradan qaldırılıb.
