Hüquqi şəxslərin maliyyə əməliyyatlarına nəzarətin təşkili ilə bağlı pozuntular nəticəsində vəzifəli şəxslərinin terrorçuluğun maliyyələşdirilməsi ilə əlaqəli cinayət törətməsi hallarında onlara cinayət-hüquqi tədbirlərin tətbiqi qaydası dəyişir.
Modern.az xəbər verir ki, bu müddəaların yer aldığı Azərbaycan Respublikasının Cinayət Məcəlləsində və Azərbaycan Respublikasının Cinayət-Prosessual Məcəlləsində dəyişiklik edilməsi haqqında Azərbaycan Respublikası qanununun layihəsi Milli Məclisin bu gün keçirilən plenar iclasında müzakirəyə çıxarılıb.
Qanun layihəsinə əsasən, hüquqi şəxs tərəfindən maliyyə əməliyyatlarına nəzarətin qanunvericiliklə müəyyən edilmiş qaydada təşkil edilməməsi nəticəsində onun vəzifəli şəxsləri xidməti vəzifələrinin icrası ilə əlaqədar Cinayət Məcəlləsinin 214-1-ci maddəsində nəzərdə tutulan cinayəti törətdikdə, hüquqi şəxsə cinayət-hüquqi tədbirlər həmin əməlin onun xeyrinə və ya maraqlarının qorunması üçün törədilməsindən asılı olmayaraq tətbiq ediləcək.
Beləliklə, hüquqi şəxsə cinayət-hüquqi tədbirlərin tətbiqi üçün cinayətin mütləq onun xeyrinə və ya maraqlarının qorunması məqsədilə törədilməsi şərti aradan qaldırılır.
Bundan başqa, Cinayət-Prosessual Məcəlləyə edilən dəyişikliklə hüquqi şəxs barəsində cinayət-hüquqi tədbirlərin tətbiqi üzrə icraat zamanı onun nümayəndəsinin dindirilməsi qaydası dəqiqləşdirilir, digər müvafiq prosessual normalar isə yeni dəyişikliklərə uyğunlaşdırılır.
Sonda məsələ səsverməyə çıxarılıb və üçüncü oxunuşda qəbul edilib.
