“Yaxın vaxtlarda “İmam Hüseyn” məscidi istifadəyə veriləcək. Məsciddə son tamamlama işləri aparılır. Biz də səbirsizliklə məscidin yenidən fəaliyyətə başlamasını gözləyirik”.
Bunu Modern.az-a açıqlamasında məscidin axundu, “Tövbə” Cəmiyyətinin sədri Hacı Əbdül Əbdülov məlumat verib.
Qeyd edək ki, Bakının qədim məscidlərindən biri olan “İmam Hüseyn” məscidi 2017-ci ildə təmirə dayanıb.
Hacı Əbdülün sözlərinə görə, məscidin mədrəsə kimi fəaliyyət göstərməsinə çalışırlar.
“Məscidin təmir xərclərini Heydər Əliyev Fondu üzərinə götürüb. Bu məscid 1988-ci ildən bəri bir dəfə də olsun təmir olunmayıb. Halbuki, məscidin təmirə dayanması çox yaxşı bir haldır. Dindar insanlar rahat və təmiz məsciddə ibadət edəcəklər. Çox istəyirik ki, məscid mədrəsə kimi də fəaliyyət göstərsin. İnşallah, buna da nail olacağıq”.
Qeyd edək ki, Yasamal rayonu Abdulla Şaiq və Süleyman Tağızadə küçələrinin kəsişməsində yerləşən “İmam Hüseyn” məscidi 1890-cı illərdə xeyriyyəçi Hacı Hacıbaba tərəfindən inşa olunub. 1920-ci ildə bolşevik çevrilişindən sonra məscid bir müddət bağlı qalıb. Lakin sonralar yenidən açılıb və Azərbaycan müstəqilliyini bərpa etdikdən sonra fəaliyyətini davam etdirib. Məscid unikal memarlıq üslubuna malikdir.
