Çin və ABŞ ümumi rifah və uğur naminə rəqabət deyil, tərəfdaşlıq münasibətlərini inkişaf etdirməlidirlər.
Modern.az xəbər verir ki, bunu mayın 14-də Pekində Xalq Nümayəndələri Evinin toplantısında Çin Xalq Respublikasının sədri Si Cinpin ABŞ prezidenti Donald Tramp ilə danışıqlar zamanı bildirib.
“Çin və ABŞ arasında qarşıdurma qarşılıqlı zərərə gətirib çıxarar, buna görə də onlar rəqib deyil, tərəfdaş olmalıdırlar”, - deyə Si Cinpin bildirib.
Çin rəhbəri qeyd edib ki, qarşılıqlı dəstək və birgə inkişaf Pekinlə Vaşinqtona müasir şəraitdə iki böyük dövlət arasında yeni əməkdaşlıq formatı formalaşdırmağa kömək edə bilər. O həmçinin vurğulayıb ki, hər iki ölkənin maraqlarına və beynəlxalq gündəliyə aid əsas məsələlər üzrə fikir mübadiləsinə ümid edir.
ABŞ prezidenti Donald Tramp isə Çinə səfərinin onun üçün böyük şərəf olduğunu bildirib.
“Bu, çox az insana nəsib olan bir şərəfdir”, - deyə o vurğulayıb.
“Siz böyük lidersiniz. Mən hamıya deyirəm ki, siz böyük lidersiniz. Bəzən insanlar bunu deməyimi xoşlamırlar, amma yenə də deyirəm, çünki bu, həqiqətdir”, - Tramp Si Cinpinə müraciətlə bildirib.
Amerika lideri həmçinin iki ölkə arasında əməkdaşlıq perspektivlərindən danışıb. Onun sözlərinə görə, ABŞ və Çini “möhtəşəm gələcək” gözləyir.
Si Cinpin isə öz növbəsində qeyd edib ki, 2026-cı il ABŞ-Çin münasibətləri üçün tarixi və əlamətdar olmalıdır.
“Çin və ABŞ sözdə "Fukidid tələsi"ni aşa və böyük dövlətlər arasında yeni münasibət modeli yarada biləcəkmi? Bunlar tarix, dünya və xalqlar tərəfindən qoyulan suallardır”, — deyə o əlavə edib.
Si Cinpin deyib ki, Tayvan məsələsinə yanlış yanaşma Çin və ABŞ arasında münaqişəyə səbəb ola bilər ki, bu da münasibətlərin ciddi şəkildə pisləşməsinə gətirib çıxarar.
“Əgər Tayvan məsələsinə yanlış yanaşılsa, iki ölkə toqquşa və hətta münaqişəyə girə bilər ki, bu da Çin-ABŞ münasibətlərini son dərəcə təhlükəli vəziyyətə salar”.
Çin lideri vurğulayıb ki, Tayvan boğazında sülh ilə “Tayvanın müstəqilliyi” bir-biri ilə uyğun gəlmir. Onun sözlərinə görə, Tayvan boğazında sülh və sabitliyin qorunması Çin və ABŞ arasında ən mühüm ortaq maraq nöqtəsidir.
“Tayvan məsələsi Çin-ABŞ münasibətlərində ən vacib məsələdir”, - deyə Si Cinpin əlavə edib.
Pekin Tayvanı Çinin ayrılmaz hissəsi hesab edir və “vahid Çin” prinsipinə əməl olunmasını Çinlə diplomatik münasibət qurmaq və ya saxlamaq istəyən dövlətlər üçün əsas şərt sayır. ABŞ-ın Tayvana silah satışı ənənəvi olaraq Vaşinqtonla Pekin arasındakı münasibətlərdə əsas gərginlik mənbələrindən biri olaraq qalır. Çin Xalq Respublikasının mərkəzi hökuməti ilə onun ada əyaləti arasında rəsmi münasibətlər 1949-cu ildə kəsilib.
Xatırladaq ki, Donald Trampın Çinə səfəri mayın 13-dən 15-dək davam edir. Səfərdə onu iri Amerika şirkətlərinin rəhbərləri müşayiət edir. Onların arasında Tesla, Apple, Boeing, Goldman Sachs Group, Blackstone, BlackRock və Citigroup rəhbərləri də var.
