Ukrayna lideri Volodimir Zelenski Vladimir Putinə münaqişəni başa çatdırmağı təklif edib.
Modern.az xəbər verir ki, Zelenski bu barədə yazdığı məktubu öz saytında dərc edib.
“Ukrayna müharibəni sizinlə bizim aramızda olan formatda başa çatdırmağı təklif edir”, - deyə məktubda qeyd olunub.
Zelenski “hamının hamıya” prinsipi əsasında əsir mübadiləsinə hazır olduğunu və beynəlxalq tərəfdaşların iştirakı ilə uzunmüddətli təhlükəsizlik təminatlarının axtarılmasını dəstəklədiyini bildirib.
O, müharibənin başa çatdırılması yollarını müzakirə etmək üçün neytral ölkədə şəxsi görüş keçirməyi təklif edib və danışıqlar müddətində tam atəşkəsə çağırıb.
Zelenski hesab edir ki, ABŞ prosesdə iştirak etməlidir və bunun yeni təhlükəsizlik arxitekturasının formalaşmasında müəyyənedici rol oynaya biləcəyini vurğulayıb.
Bundan əvvəl Rusiya prezidenti Vladimir Putin bəyan etmişdi ki, əgər Kiyevdə istək olarsa, Rusiya Ukraynada sülh müqaviləsini imzalayacaq şəxsləri tapacaq. O həmçinin xatırladıb ki, Zelenskinin prezidentlik səlahiyyətlərinin müddəti düz iki il əvvəl başa çatıb və Rusiyanın mövqeyinə görə sənədlər yalnız legitim nümayəndələrlə imzalana bilər.
