2025-ci ildə Azərbaycanda aliment ödəməkdən yayınan 4299 borclu barədə inzibati xəta haqqında protokol tərtib edilib. Onlardan 2344 nəfər inzibati qaydada həbs olunub.
Modern.az-ın məlumatına görə, məsələ Milli Məclisinin Ailə, qadın və uşaq məsələləri komitəsinin bugünkü iclasında müzakirə olunan Azərbaycan Respublikasının Ailə, Qadın və Uşaq Problemləri üzrə Dövlət Komitəsinin 2025-ci il üzrə Məlumatında əksini tapıb.
Bildirilib ki, 2025-ci ildə aliment ödəməkdən yayınan 4299 borclu barəsində inzibati xəta haqqında protokol tərtib edilib. 2024-cü ildə bu rəqəm 4131 olub.
Qeyd olunub ki, onlardan 3083 nəfər barəsində məhkəmələr tərəfindən müvafiq inzibati tənbeh tədbirləri tətbiq olunub. 2024-cü ildə isə bu göstərici 2987 təşkil edib.
Hesabatda vurğulanıb ki, 2344 nəfər inzibati qaydada həbs olunub. 2024-cü ildə isə 2318 nəfər barədə inzibati həbs qərarı verilib.
Sənədə əsasən, 2025-ci ildə cinayət məsuliyyətinə cəlb etmə haqqında 286 təqdimat verilib. 2024-cü ildə bu göstərici 174 olub.
Məlumata görə, təqdimatlardan 235-i üzrə təhqiqatçılar tərəfindən cinayət işi başlanıb. 3 təqdimat üzrə cinayət işinin başlanması rədd edilib, 48 təqdimat isə növbəti hesabat dövrünə qalıq keçib.
