"Azərbaycanla İndoneziya arasında olan münasibətlər 2017-ci ildə əvvəlki illərə nisbətən daha yaxşı inkişaf edib. Bu inkişaf daha çox iqtisadiyyat və mədəniyyət sahələrində olub". Modern.az xəbər verir ki, bu sözləri İndoneziyanın Azərbaycandakı səfiri Hüsnan bəy Fənani deyib.
Səfir bildirib ki, 2017-ci ildə Azərbaycan və İndoneziya arasında, xüsusilə, iqtisadi və mədəniyyət sahələrində əlaqələr 2015-16-cı illərlə müqayisədə daha yüksək səviyyədə inkişaf edib: “İl ərzində idxal və ixracata dair qeydə alınan statistik göstəricilər bunun sübutudur.
2015-2016-cı illərdə bu rəqəm 19 milyon idisə, cari ildə bu həcm 46 milyon dollar səviyyəsinə çatıb”.
Azərbaycan və İndoneziya arasında əlaqələrin inkişafında Azərbaycanlı gənclərin rolunu xüsusi vurğulayan səfir deyib ki, 2018-ci ildə İndoneziya Azərbaycanda əsasən təhsil sahəsində əlaqələri genişləndirməyə çalışacaq: "Gələn il Cakartada Azərbaycan Dil Mərkəzi fəaliyyətə başlayacaq. Gələn ilin sentyabr-oktyabr aylarında Azərbaycanda İndoneziya mədəniyyət günləri keçirməyi də planlaşdırırıq. Eyni zamanda qarşılıqlı səfərlər, iş adamları arasında qarşılıqlı əməkdaşlıq, təqaüd proqramlarının həyata keçirilməsinə çalışacağıq".