İran Prezidenti Məsud Pezeşkianın təyyarəsi Qırğızıstanda keçirilən Şanxay Əməkdaşlıq Təşkilatının sammitindən qayıdarkən Tehrana deyil, Rəşt şəhərinə eniş edib.
Modern.az xəbər verir ki, bu barədə İranın dövlət xəbər agentliyi İRNA məlumat yayıb. Təyyarədə Pezeşkianla yanaşı, İranın xarici işlər naziri Abbas Araqçı və idman və gənclər naziri də olub.
İran mediasının məlumatına görə, Pezeşkianın təyyarəsi daha sonra Tehrana yola düşüb və prezident paytaxta çatıb. Pezeşkianın sentyabrın 2-də səhər saatlarında Tehrana gəldiyini təsdiqləyib.
Təyyarənin Rəştə enməsinin dəqiq rəsmi səbəbi açıqlanmayıb. Lakin hadisə Tehranın şərq hissəsində hava hücumundan müdafiə sistemlərinin işə salınması ilə bağlı xəbərlərin yayıldığı vaxta təsadüf edib. İranın Mehr agentliyi sentyabrın 1-də Tehranın şərqində hava hücumundan müdafiə sistemlərinin aktivləşdirildiyini bildirib.
İsrail mediası isə təyyarənin Rəştə yönləndirilməsini İran ərazisinə ABŞ zərbələri fonunda Tehranda hava hücumundan müdafiə sistemlərinin fəaliyyətə başlaması ilə əlaqələndirib. Bu versiya hələlik rəsmi Tehran tərəfindən təsdiqlənməyib.
Pezeşkianın səfəri Yaxın Şərqdə vəziyyətin yenidən gərginləşdiyi bir vaxta təsadüf edib. Bundan əvvəl İran Prezidenti ŞƏT sammitində çıxışı zamanı ABŞ-la iyun ayında əldə olunmuş atəşkəs razılaşmasına qayıtmağa hazır olduqlarını, bunun üçün isə Vaşinqtonun da üzərinə götürdüyü öhdəlikləri yerinə yetirməli olduğunu bildirmişdi.
Beləliklə, Pezeşkianın təyyarəsinin Tehrana deyil, Rəştə enməsi bölgədə gərginliyin yenidən artdığı bir vaxtda baş verən diqqətçəkən hadisələrdən birinə çevrilib.
