Artıq “Palmali” Şirkətlər Qrupu gəmilərini öz gəmiqayırma zavodunda inşa edəcək. Türkiyənin İzmit vilayətindəki Gölcük bölgəsində yerləşən Armada gemiqayırma zavodunda eyni vaxtda 2 gəminin əsas korpusunun inşası başlayıb. Gəmiler “Volqa-Don maks” tankeri sinfinə aiddir.

“Palmali”nin mətbuat xidmətindən Modern.az-a bildirlib ki, yeni layihə gücləndirilmiş dəniz funksiyasına malikdir, dəniz şəraitində 7100 tonn dedveyt yük götürür, yükgötürmə qabiliyyətini çaylardan keçərkən daha da artıra bilir. Volqa-Don bərə keçidindən və Volqa-Baltiysk su yollarından keçmə qabiliyyətinə malikdir.

Gəmilərin kilinin inşasına başlama mərasimində “Palmali” Şirkətlər qrupunun prezidenti Mübariz Mənsimov, tanınmış iş adamı, Fiba Holding İdarə Heyətinin sədri Hüsnü Özyeğin  və  başqa nüfuzlu iş adamları, siyasətçilər iştirak ediblər. Ənənəyə uyğun olaraq xatirə lövhəsi gəminin gövdəsinə bərkidilib, əsas korpusun inşasına start verilib.

İlk gəmi gələn ilin fevral ayında suya endiriləcək.  

RST22M tipli  gəminin ümumi uzunluğu 139,95 metr, eni isə 16,6 metr, bortun hündürlüyü 6,0 metrə bərabərdir.

Layihə hazırlanarkən dünya neft şirkətlərinin tələbləri nəzərə alınıb, layihəyə “ЭКО ПРОЕКТ" (ECO-S) tipli Rusiyanın gəmi reqistrinin ekoloji məhdudiyyət sinfi də əlavə olunub.

“Palmalı” şirkətlər qrupu Aralıq dənizi, Xəzər və Qara dəniz sularında əsasən SOCAR və LUKOYL kimi neft şirkətlərinin yüklərini daşıyır, həmçinin digər böyük neft və neft məhsulları şirkətləri ilə uzunmüddətli müqavilələrə malikdir.

Modern.az