Azərbaycan Baş Prokurorluğu Türkiyə vətəndaşı, “Şanlıurfa Olay” qəzetinin köşə yazarı Celal Çiftçini beynəlxalq axtarışa verib. O, Azərbaycanda hakimiyyətin zorla ələ keçirilməsinə, konstitusiya quruluşunun zorla dəyişdirilməsinə, dini nifrət və düşmənçiliyin salınmasına yönələn materialların yayılmasında təqsirləndirilir.
Modern.az saytı Celal Çiftçinin kimliyini araşdırıb.
Araşdırmalarda türkiyəli jurnalistin siyasi fəaliyyəti də diqqət çəkir. Türkiyə mətbuatında dərc olunan məlumatlar onun jurnalistlikdən əlavə, siyasi proseslərdə də iştirak etdiyini göstərir.
1975-ci ildə Şanlıurfada anadan olan Celal Çiftçi jurnalistikaya 1992-ci ildə başlayıb. O, müxtəlif yerli televiziya kanallarında çalışıb, 2005-ci ildə “Şanlıurfa Olay” qəzetini təsis edib. Sonralar Olay Media Qrupunun rəhbəri kimi fəaliyyət göstərib.
C.Çiftçi 2023-cü ildə Türkiyədə keçirilən parlament seçkiləri ərəfəsində Cümhuriyyət Xalq Partiyasından (CHP) Şanlıurfa üzrə deputatlığa namizədliyini irəli sürüb. Həmin vaxt yerli media onun CHP-dən namizədliyə müraciət etdiyini yazıb.
Səadət Partiyası ilə əlaqəsi
Celal Çiftçinin Səadət Partiyası ilə əlaqələrinə dair də açıq mənbələrdə məlumat var. “Şanlıurfa Olay” qəzetinin 21 avqust 2025-ci il tarixli xəbərinə görə, Çiftçi Olay Media Qrupunun rəhbəri kimi partiyanın baş qərargahını ziyarət edib. O, Səadət Partiyasının media və kommunikasiya məsələlərinə məsul sədr müavini Mustafa Yılmazla görüşüb. Görüşdə Türkiyə siyasəti, Anadolu mətbuatının problemləri və jurnalistikanın dəyişən şərtləri müzakirə olunub.
Onun hazırda Səadət Partiyasının üzvü olduğu bildirilir.
Bəzi məlumatlara görə, Celal Çiftçi daha əvvəl hakim Ədalət və İnkişaf Partiyasının (AK Parti) üzvü olub, sonradan partiyadan ayrılaraq Səadət Partiyasına yaxınlaşıb. Onun AK Partiyadan ayrılmasının səbəbinin orada siyasi üstünlük əldə edə bilməməsi olduğu bildirilir.
Maraqlıdır ki, Celal Çiftçinin xanımının hazırda Ədalət və İnkişaf Partiyasında təmsil olunduğu qeyd edilir.
Səadət Partiyasının sədri Azərbaycanın işlərinə qarışır
Qeyd edək ki, Celal Çiftçinin hazırda üzvü olduğu Səadət Partiyasının sədri Mahmut Arıkan son günlər Azərbaycanla bağlı açıqlaması ilə də gündəmə gəlib.
Türkiyə mediasının məlumatına görə, M.Arıkan 12 oktyabr 2026-cı ildə Azərbaycanın daxili işlərinə qarışaraq məktəbli qızların hicabla bağlı üzləşdiyi vəziyyətə etiraz edib və Azərbaycan rəhbərliyini qərarından geri çəkilməyə çağırıb.
Azərbaycan Baş Prokurorluğu nə açıqlayıb?
Azərbaycan Baş Prokurorluğunun 16 oktyabr 2026-cı il tarixli məlumatına əsasən, sosial şəbəkələrdə Celal Çiftçi də daxil olmaqla müxtəlif şəxslər tərəfindən hakimiyyətin zorla ələ keçirilməsinə, konstitusiya quruluşunun zorla dəyişdirilməsinə, eləcə də zor tətbiqi ilə dini nifrət və düşmənçiliyin salınmasına yönələn materialların yayılması ilə bağlı araşdırma aparılıb.
Toplanmış materiallar əsasında Cinayət Məcəlləsinin 281.2, 283.2.1 və 167-3.1-ci maddələri ilə cinayət işi başlanıb. Baş Prokurorluq Çiftçinin cinayət işi üzrə təqsirləndirilən şəxs qismində cəlb olunduğunu və barəsində beynəlxalq axtarış elan edildiyini bildirib.
Qurumun açıqlamasına görə, istintaq çərçivəsində Türkiyənin səlahiyyətli orqanlarına beynəlxalq hüquqi yardım barədə sorğular göndərilib.
Qeyd edək ki, beynəlxalq axtarış və cinayət işi üzrə irəli sürülən ittihamlar özlüyündə şəxsin təqsirinin məhkəmə tərəfindən sübuta yetirilməsi demək deyil. İş üzrə yekun hüquqi qiymət istintaqın və məhkəmə araşdırmasının nəticələrindən asılıdır.
A.Qorxmaz
