“Camal Qaşıqçının öldürülməsi olayı tam olaraq işıqlandırılmayıb. Bu hərəkəti ən güclü şəkildə pisləyirik. Səudiyyə Ərəbistanından Qaşıqçının ölüm səbəbi məsələsində şəffaflıq gözləyirik. İstanbuldakı hadisələr barədə yetərli məlumat verilməyib”. Modern.az xəbər verir ki, bunu Almaniya kansleri Angela Merkel bildirib.
Merkel Səudiyyə Ərəbistanından bu məsələdə şəffaflıq tələb edib.
Bu arada Camal Qaşıqçının qətli işinə Səudiyyə Ərəbistanının məhkəməsində baxılacağı ilə bağlı açıqlama verilib. Krallığın ədliyyə naziri, şeyx Valid bin Məhəmməd əs-Samaani bildirib ki, Qaşıqçının öldürülməsi Səudiyyə Ərəbistanının suveren ərazisində baş verib. Müvafiq prosedurun başa çatmasından sonra iş baxılması üçün Səudiyyə məhkəməsinə göndəriləcək.
Qeyd edək ki, Camal Qaşıqçı oktyabrın 2-də Səudiyyə Ərəbistanının İstanbuldakı Baş Konsulluğunun binasına gəlib və bundan sonra itkin düşüb.
