ABŞ-ın Azərbaycandakı səfirliyi Heydər Əliyev Fondunun təşəbbüsü ilə 5-ci dəfə keçirilən Bakı marafonunun idmançılarını təbrik edib.
Modern.az xəbər verir ki, bu barədə səfirlikdən bildirilib.
“ABŞ səfirliyi bu gün Bakı Marafonu yarışında iştirak edən idmançılara qoşulub. Bütün iştirakçıları təbrik edirik!”, - səfirliyin yaydığı məlumatda deyilir.
Qeyd edək ki, marafonun kişi iştirakçıları arasında qalib rusiyalı, 1989-cu il təvəllüdlü Rinas Axmadiyev olub. O, məsafəni 1 saat 3 dəqiqə 11 saniyəyə qət edib.
Qadın iştirakçılar arasında qalib isə ukraynalı, 1990-cı il təvəllüdlü Veretska Valentyne olub. O, məsafəni 1 saat 16 dəqiqə 59 saniyəyə qət edib.
Fiziki məhdudiyyətli şəxslər arasında yarışın qalibi 51 yaşlı Mehman Ramazanzadədir. O qələbəni 57 dəqiqəyə qazanıb.
“Bakı Marafonu 2022”də 15 minədək iştirakçı qeydiyyatdan keçib. 2016-cı ildən təşkil edilən tədbir idmanın inkişafına dəstək, sağlam həyat tərzinin təbliği məqsədi daşıyır.
