Xarici agentlər haqqında qanun layihəsi Gürcüstanın xarici tərəfdaşlarının, o cümlədən Aİ-nin etirazlarına və həddindən artıq narahatlığına baxmayaraq, Gürcüstan parlamentinin plenar iclasına təqdim olunub.

Modern.az Gürcüstan mətbuatına istinadən xəbər verir ki, parlamentdə sarı təhlükəsizlik səviyyəsi yenidən tətbiq edilib.

Yenə etirazlar olacaq və aksiyalar saat 11:00-da başlayacaq. Bir gün əvvəl etirazçılar artıq Rustaveli prospektini bağlayıblar, aksiya gecə yarısına qədər davam edib, polis 14 nəfəri saxlayıb. Axşama yaxın qanun layihəsi hüquq komitəsi tərəfindən təsdiqlənib - iclas "fırtınalı" keçib, müxalifətçilər zaldan çıxarılıb və onlara "Rusiya qanunu" ifadəsini deməyə icazə verilməyib.

Deputat Aleko Elisaşvili buna dözməyib və hakimiyyətdə olan partiyanın liderlərindən biri Mamuka Mdinaradzeni vurub, bundan sonra hakim partiyanın deputatları dəhlizdə ona hücum ediblər. Parlament qarşısında etiraz aksiyaları və parlamentdə dava-dalaş yaşandığı bir vaxtda Aİ, ABŞ və Böyük Britaniya səfirləri baş nazir İrakli Kobaxidze ilə danışıblar.

Hökumət başçısı onlara bildirib ki, qanun layihəsi tam hüquqi prinsiplərə uyğundur və ona qarşı olan arqumentləri qəbul etmir.

Küçə fotoqrafı Gagosh bir il əvvəlki məşhur işini xatırladıb və şəkil yenidən sosial şəbəkələrdə yayılıb. Şəkildə qədim gürcü insanı Zezva “xarici agentlər” haqqında qanunun qalıqlarına sidik ifraz edir. Fotoqraf statusunu yeniləyib: “Mən ilk avropalının etirazına qoşuluram - Rusiya qanunlarına qarşıyam”.