“Ümumdünya Meteorologiya Təşkilatının 5 regional mərkəzinin hazırladığı iqlim proqnozlarına görə, bu ilin yay fəslində - iyul-avqust aylarında Cənubi Qafqazda, o cümlədən Azərbaycanda proqnozlaşdırılan hava şəraiti barədə məlumat açıqlanıb. Proqnoza əsasən havanın temperaturu iqlim normasından 1-2 dərəcə yüksək, yağıntının miqdarı isə normadan az olacaq”.
Bu haqda Modern.az saytına Ekologiya və Təbii Sərvətlər Nazirliyi Milli Hidrometeorologiya Departamentinin Hidrometeoroloji Proqnozlar Bürosunun baş hidroloqu Asif Verdiyev məlumat verib:
“Bildiyiniz kimi, 2014-cü ildə iqlim normasından yüksək istilər qeydə alınıb. Avqust ayının 19-da Gəncədə 42, Gədəbəydə 37, Zaqatala və Balakəndə 41, Şəkidə 40 dərəcə rekord istilər qeydə alınmışdı. Uzunmüddətli istilər oldu, iyun ayının ortalarından başlayaraq sentyabrın əvvəlinə qədər yağıntı qeydə alınmadı”.
Nazirlik rəsmisi qeyd edib ki, ötənilki rekord temperatur göstəricisi bu il də müşahidə edilə bilər. Asif Verdiyev onu da deyib ki, bölgələrdə yağıntının miqdarı iqlim normasına yaxın olacaq:
“Bu il ötən illə müqayisədə fərqlidir. Məsələn, bu ilin iyun ayı ötən ilə nisbətdə sərin keçir. Müşahidələr göstərir ki, iyul-avqust aylarında ayrı-ayrı günlərdə qısamüddətli olsa da, rekord isti gözlənilir. Ümumi temperatur isə iqlim normasından 1-2 dərəcə çox ola bilər”.
Gülşən RAUFQIZI
