VII Beynəlxalq Sosial Elmlər Konqresi çərçivəsində Bakıya gələn Türkiyənin 40-dan çox universitetinin rektoru Təhsil Nazirliyi və Azərbaycan universitetlərinin rəsmiləri ilə görüşərək, əlaqələrin inkişafı ilə bağlı fikir mübadiləsi aparıblar.
Modern.az xəbər verir ki, görüşlərdə Türkiyə və Azərbaycanın Bakıda yaradılmasını planlaşdırdığı birgə universitet, ikili diplom təcrübəsi, tələbə və müəllim mübadiləsi kimi aktual məsələlər müzakirə olunub.
Türkiyənin Ali Təhsil Şurasının sədr müavini Safa Kapıcıoğlu Türkiyə Prezidenti Rəcəb Tayyib Ərdoğan və Azərbaycan Prezidenti İlham Əliyevin ortaq iradəsi ilə gündəmə gətirilən birgə universitetlə bağlı işlərin davam etdirildiyini bildirib. Azərbaycan Təhsil Nazirliyi ilə birlikdə işlər gördüklərini deyən Kapıcıoğlu tezliklə layihənin həyata keçiriləcəyini söyləyib: “Demək olar ki, başa çatmaq üzrədir”.
Kapıcıoğlu Azərbaycan ilə Türkiyə arasında ali təhsil əlaqələrinin daha da genişləndiyini, universitetlər arasında qarşılıqlı səfərlərin, əməkdaşlıq və ortaq diplom proqramlarının davam etdiyini sözlərinə əlavə edib.
Ankara Universitetinin (AU) rektoru professor Necdet Ünüvar pandemiya dövrünün iki ölkənin təhsil sahəsinin yaxınlaşmasında körpü yaratdığını və bəzi proqramların, dərslərin, konqreslərin və görüşlərin daha asan keçirilə biləcəyi mühiti fürsətə çevirdiklərini ifadə edib. O, Azərbaycanın Tibb Universiteti, İqtisad Universiteti və Texniki Universitet ilə intensiv əməkdaşlıq edildiyini və protokol imzalandığını qeyd edib:
“Biz yalnız kağız üzərində protokollar tərtib etməmişik, bəzi fəaliyyət planlarını da həyata keçirmişik. Məsələn, biz bu üç universitetin tələbələrinə Ankara Universitetinin tələbələrinə verdiyimiz imkanları təklif etdik. Biz parolları azərbaycanlı tələbələrimizə və müəllimlərimizə verdik. Onlar da onlayn mühazirələrimizdə iştirak etdilər və bundan böyük məmnunluqlarını bildirdilər", - deyə rektor bildirib.
Ünüvar Türkiyə ilə Azərbaycanın birgə layihələri və investisiyaları ilə bağlı bunları qeyd edib: “Türkiyənin Azərbaycanda çox mühüm investisiyaları var, Azərbaycanın da Türkiyəyə önəmli investisiyası mövcuddur, lakin ən mühüm investisiya təhsildir. Biz Ankara Universiteti olaraq təhsil sahəsində Azərbaycanla sıx əməkdaşlıq edirik. Biz ikili diplom proqramlarına da başlamışıq. Azərbaycan Texniki Universiteti ilə kompüter mühəndisliyi üzrə ikili diplom proqramına, İqtisad Universiteti ilə biznesin idarə edilməsi üzrə ikili diplom proqramına başlayacağıq, lakin bunlarla məhdudlaşmayacaq”.
Qazi Universitetinin rektoru professor Musa Yıldız isə Azərbaycan Texniki Universiteti ilə elektrik və elektron mühəndislik sahəsində ikili diplom təhsili aldıqlarını, professor-müəllim heyəti və tələbə mübadiləsi apardıqlarını bildirib. M.Yıldız Azərbaycan Tibb Universitetinin tələbələrinə tibb bacısı və fizioterapiya sahəsində də onlayn təlim keçdiklərini deyib.
Müxtəlif layihələr çərçivəsində Azərbaycanın 10-dan çox universiteti ilə tələbə və müəllim mübadiləsi apardıqlarını xatırladan rektor qeyd edib ki, elektrik və elektronika mühəndisliyi sahəsində Azərbaycan Texniki Universiteti ilə ikili diplom müraciəti son mərhələyə çatıb.
Ege Universitetinin rektoru professor Necdet Budak Azərbaycan Dövlət Aqrar Universiteti ilə Ege Universiteti arasında ikili diplom proqramını həyata keçirdiklərini açıqlayıb. O, Ege Universitetinin müəllimlərinin 3 ildir Azərbaycan Dövlət Aqrar Universitetində dərs dediyinə diqqət çəkib.
“Son bir ildə azərbaycanlı tələbələr 4-cü kursda İzmirdəki Ege Universitetində tədris planımızı görəcək və məzun olacaqlar. Bu diplomlar həm Azərbaycanda, həm də Türkiyədə tanınacaq”, - deyə rektor bildirib.
Qeyd edək ki, Azərbaycanda 7-ci Beynəlxalq Sosial Elmlər Konqresi keçirilib. İyunun 2-də Bakıda başlayan tədbir iki gün sonra Şuşada yekunlaşıb. Konqresdə xüsusi qonaq olaraq Türkiyə Böyük Millət Məclisinin sədri Mustafa Şentop və Azərbaycan Milli Məclisinin sədri Sahibə Qafarova iştirak ediblər. Eyni zamanda Türkiyənin 40-dan çox universitetinin rektoru Bakıdakı toplantıya qatılıb.
Akif İsmayılov
