Turkiya Prezidenti Rajab Toyyib Erdoʻgʻanning bosh maslahatchisi Oktay Saral lavozimidan ozod etildi.
Modern.az xabariga koʻra, bu haqda "Jumhuriyat" sayti maʼlumot tarqatgan. Saral masala boʻyicha bayonotida shunday degan:
“Meni lavozimga hurmatli Prezidentimiz tayinlagan edi, uning koʻrsatmasi bilan ketdim. Hech kimdan xafagarchiligim yoʻq”.
Jurnalist Talat Atilla esa Oktay Saral bilan telefon orqali gaplashganini aytib, suhbat tafsilotlarini boʻlishdi.
“Turkiya Prezidentining bosh maslahatchisi janob Oktay Saralga qoʻngʻiroq qildim.
Undan ‘Lavozimdan ozod etildingizmi?’ deb soʻradim.
‘Ha. Biz lavozim bilan mavjud boʻlgan odamlar emasmiz. Hurmatli Prezidentimiz meni bu lavozimga tayinlagan edi, uning koʻrsatmasi bilan ketdim. Hech kimdan xafagarchiligim yoʻq’, — deb javob berdi.
‘Bu Ozarbayjon boʻyicha bayonotlaringiz uchunmi?’ deb soʻradim.
‘Ha, shunday koʻrinadi’, — javobini berdi.
Keyin bu soʻzlarni aytdi:
‘Asosiy narsa Turkiya Respublikasidir. Asosiy narsa hurmatli Prezidentimizning muvaffaqiyatidir’”.
Qayd etish joizki, bir necha kun oldin Ozarbayjonda oʻrta maktablarda qabul qilingan kiyim formasining yagonaligini buzadigan, shuningdek, umumiy taʼlimning dunyoviylik prinsipiga mos kelmaydigan boshqa kiyim elementlaridan foydalanishga yoʻl qoʻymaslik boʻyicha qaror imzolangan edi.
Shundan soʻng Turkiya Prezidentining bosh maslahatchisi Oktay Saral 13-oktabr kuni ijtimoiy tarmoqda bayonot yozgan edi:
“Ozarbayjonda hijobli oʻquvchilarning taʼlim olish huquqini cheklash qabul qilinishi mumkin emas! Bu davrda bunday yondashuvga aslo yoʻl qoʻyilmasligi kerak!”
Bularning barchasidan soʻng Turkiya Prezidentining bosh maslahatchisi Oktay Saralning lavozimidan ozod etilgani maʼlum qilindi.
