Turkiya va Armaniston o‘rtasidagi tarixiy Ani ko‘prigi qayta quriladi.
Modern.az "TRT Haber"ga tayanib xabar berishicha, bu haqda Turkiya transport va infratuzilma vaziri Abdulkadir Uraloğlu ma’lum qildi. Uning so‘zlariga ko‘ra, ko‘prikni qayta qurish bo‘yicha tender jarayoni yakunlangan.
Uralo‘g‘luning so‘zlariga ko‘ra, ko‘prik O‘rta asrlarning muhim savdo markazlaridan biri bo‘lgan Anida joylashgan. X asrda Ipak yo‘li ustida qurilgan va bugungi kungacha faqat tayanchlari saqlanib qolgan tarixiy inshoot qayta tiklanadi.
Ipak yo‘li ustida bojxona nazorat punkti sifatida qurilgan ko‘prik asrlar davomida Sharq va G‘arb o‘rtasidagi savdoning muhim o‘tish nuqtalaridan biri bo‘lgan. Vazir inshootning tarixiy va madaniy meros nuqtai nazaridan katta ahamiyatga ega ekanligini ta’kidladi.
Uralo‘g‘lu ko‘prikning uzunligi 80 metr, eni esa 8 metr bo‘lganini ma’lum qildi. Inshoot Arpachay daryosi o‘zanining 36 metrgacha toraygan nuqtasida joylashgan. Ko‘prikning 31 metrli arkasi 1807-yil 16-oktabrda qulagan.
Ani ko‘prigi joylashgan Ani arxeologik hududi 21 madaniy meros namunasi bilan birgalikda 2016-yilda YuNESKOning Jahon merosi ro‘yxatiga kiritilgan. Uralo‘g‘luning so‘zlariga ko‘ra, asosiy maqsad tarixiy inshootni saqlab qolish va kelajak avlodlarga yetkazishdir.
Uralo‘g‘lu Turkiya va Armaniston o‘rtasida imzolangan protokol doirasida tiklash ishlari qo‘shma komissiya muvofiqlashtiruvi ostida amalga oshirilishini bildirdi.
Ko‘prikni qayta qurish bo‘yicha ishlarning ko‘lami va usullarini belgilovchi protokol 4-may kuni Yerevanda imzolangan.
