İranın daha bir şəhərində əhali ayağa qalxıb. Modern.az xarici mediaya istinadən xəbər verir ki, Şiraz şəhərində su və işıqların tez-tez kəsilməsindən təngə gələn əhali küçələrə axışıb.

Əhali isti hava şəraitində sudan və elektrikdən məhrum qalmasına və yerli məmurların səriştəsizliyinə qarşı etiraz aksiyası keçiriblər.

Dünən axşam saatlarında Şirazda yolları bağlayan etirazçılar, avtomobillərin hərəkətinə mane olaraq, yerli məmurları şəhərdə yaranmış ağır vəziyyətə görə cavabdeh olmağa çağırıblar. Gecə saatlarına qədər davam edən dinc aksiyada, etirazçılar rəsmilərin ölkə vətəndaşlarının durumuna laqeyd qalmasına qarşı şüarlar səsləndiriliblər. Etirazlarda mümkün həbslərin olub-olmaması barədə hər hansı bir məlumat yayılmayıb.

Qeyd edək ki, son həftələr İranın bir neçə şəhərində, o cümlədən də Borazcan, Xürrəmşəhr, Əhvaz, Abadan, Şadqan və İsfahanda su qıtlığından, həmçinin, vaxtaşırı əhaliyə çirkli suyun verilməsindən əziyyət çəkən on minlərlə insan küçələrə axışaraq hökumətə qarşı şüarlar səsləndiriblər.