Misir xaricdən maye təbii qaz idxalının tam dayandırılmasını elan edib.
Modern.az xəbər verir ki, bu barədə Misirin neft və mineral ehtiyatlar naziri Tarik əl-Mulla bəyan edib.
Onun sözlərinə görə, Misirdə təbii qaz hasilatı artıq gündəlik 6,6 milyard kub futa çatıb. O deyib: “Ötən ilin dekabr ayından “Zöhr” iri qaz yatağının işə salınmasından Misirdə qaz hasilatı daim artır”.
Xatırladaq ki, Aralıq dənizi şelfində yerləşən “Zöhr” qaz yatağı İtaliyanın “Eni” şirkəti tərəfindən 2015-ci ildə aşkarlanıb. Yataq 100 kvadrat kilometrə yaxın ərazidə 30 trilyon kub futadək (850 milyard kubmetr – geoloji ehtiyat) potensial qaza malikdir.
Tarik əl-Mulla qeyd edib ki, Misir “mavi yanacaq”la artıq özünü təmin etməyə qadirdir və hazırda maye təbii qazın regional ticarət mərkəzi olması üzərində çalışırlar.