Son günlər bölgələrdə heyvan bazarında ucuzlaşma müşahidə edilir. Modern.az “Xəzər xəbər”ə istinadən xəbər verir ki, rayonlarda heyvan bazarında qiymətlər kifayət qədər aşağı düşüb. Ağdaş rayonunda bazara çıxarılan iri və xırdauynuzlu heyvanların həddindən çox olması ucuzlaşmaya səbəb olub. Belə ki, əvvəllər diri çəkili inək və dana 350-500 və ya 700-900 manata satılırdısa, indi bu qiymətlər 150-200, hətta 300 manata qədər aşağı düşüb.

Ucuzlaşma elə xırdabuynuzlu heyvanlarda da müşahidə olunur. 250-280 manata satılan quzulu qoyun hazırda 150-190 manatdır.

Tovuzda da mal bazarında heyvanların qiymətində bir aydır ki, enmə müşahidə olunur. Ucuzlaşma, xüsusən iribuynuzlu heyvanların satışında daha çox hiss olunur. Bir heyvanda 200-300 manata qədər ucuzlaşma olub.

Qiymətlərin aşağı düşməsi ətliklə yanaşı, südük heyvanlara da siraət edib. Qoyun-quzunun qiymətində isə 10-15 manata qədər enmə var. Fermerlər ucuzlaşmanın əsas səbəbini bazardakı bir ay əvvələ qədər olan durğunluqla əlaqələndirir.

Digər bölgələrlə müqayisədə ucuzlaşma Bərdə bazarında azdır. Belə ki, əvvəlki həftələrə nisbətən iribuynuzlu heyvanlar 60 manata qədər, xırda heyvanlar isə 25-30 manat aşağı təklif edilir.

Bu vəziyyət regionlarda ətin qiymətinə də təsir edib. Bazarlarda mal ətinin kiloqramı 8-9, quzu əti isə 10-11 manatdıdır.

Maraqlıdır ki, bölgələrdə kifayət qədər ucuzlaşma olduğu halda, paytaxt bazarlarında enmə müşahidə edilmir.