“Son günlər düşən intensiv atmosfer yağıntılarından sonra Bakıda və Abşeron yarımadasında sürüşmə zonalarında nisbi aktivlik müşahidə edilir”.
Bu haqda Modern.az-a Ekologiya və Təbii Sərvətlər Nazirliyinin (ESTN) Geoloji kəşfiyyat ekspedisiyasının rəisi Rafiq Həsənov məlumat verib.
R.Həsənov deyib ki, hazırda Zığ sürüşmə sahəsində aktivləşmə davam edir:
“Burada torpaq qatındakı çatlar təxminən 2 santimetrə qədər genişlənib. Tikililərin divarındakı çatlar da kifayət qədər artıb.
Əhmədli sürüşmə-lokal sahəsində, Xətai rayonu ərazisində yerləşən 48 nömrəli məktəbin həyətində uçqun prosesi baş verib. Uçqunun baş verməsinə səbəb yamacın dik olması və yağıntılar nəticəsində süxurların dayanıqlılığını itməsidir. Təxmini məsafəsi 25 -30 metr, hündürlüyü 4 metr olan ərazidə uçqun qeydə alınıb”.
Onun sözlərinə görə, Masazır sürüşmə sahəsində aktivlik qeydə alınmasa da, qəsəbənin özündə uçqun qeydə alınıb:
“Qəsəbənin Mirzəyev küçəsi, 13 ünvanı və onun yaxınlığındakı 30 metr məsafədə dik yamac atmosfer çöküntülərinin təsirindən uçub. Bundan başqa sürüşmə sahələrində elə bir aktivlik izlənilməyib”.
Nazirlik rəsmisi deyib ki, itensiv yağıntılardan sonra subasma sahələri də aktivləşib:
“Həmin ərazilərdə yağış sularının təsirindən qrunt sularının qalxması və ərazilərin su ilə basılması müşahidə edilir.
Subasma ilə əlaqədar Sabunçu rayonunun Savalan yaşayış qəsəbəsində, daş karxanasında, “Şuşa” şəhərciyi adlanan yerdə qrunt sularının səviyyəsi həddindən artıq çoxalıb. Nəticədə ətraf ərazilərin həyətyanı sahələri, hətta evlər su altında qalıb.
Həmçinin, Binəqədi rayonu ərazisində Məlik Aslanov küçəsi, 10 və 11-ci döngələrdə qrunt sularının qalxması və ətraf ərazilərin su ilə basılması tərəfimizdən müşahidə edilir. Subasma hadisəsi olan yerlərdə, adi günlərdə qrunt suları yer səthinə təxminən 5-20 santimetr məsafədə yerləşir. Yağıntıların təsirindən isə qrunt sularının qalxması və ətrafı basması qeydə alınıb”.
Gülşən RAUFQIZI
