Daşkəsən rayonunda ölümlə nəticələnən ağır yol qəzası baş verib. Belə ki, “Niva” markalı avtomobilin sürücüsü idarəetməni itirib.

Avtoqəza Xoşbulaq-Daşkəsən yolunun 12-ci km-də baş verib. Hadisəyə ilkin səbəb kimi isə yüksək sürət göstərilir.

Qeyd edək ki, avtomobil Xoşbulaq istiqamətindən rayon mərkəzinə gələrkən yolun kənarındakı beton sədləri aşaraq təxminən 250 metr hündürlükdən dərənin dibinə yuvarlanıb.
Hadisə nəticəsində 40 yaşlı sürücü Əliyev Azay İsgəndər oğlu aldığı ağır bədən xəsarətlərindən elə yerindəcə dünyasını dəyişib. Mərhum avtomobildə tək olub.

Daşkəsən rayon Polis Şöbəsinin baş müstəntiqi Təvəkkül Həsənov Modern.az-a deyib ki, olkin etimal sürücünün avtomobili yüksək sürətlə idarəetməsidir.
”Belə ki, qəzanın baş verdiyi yer döngədir. Ona görə ehtimal o nəzərdə tutulur ki, sürücü sürətlə hərəkətdə olarkən sükanda idarəetməni itirib. Faktla əlaqədar Cinayət Məcəlləsinin 163.2 maddəsi ilə iş açılıb, istintaq aparılır.”