Tovuz rayonunda qədim tariximizin sirli məqamlarının yatması heç kimə sirr deyil.
Azərbaycan Yazıçılar Birliyinin üzvü, tarixi romanlar müəllifi Cəlaləddin mətbuata çıxış etdiyi məqaləsində Tovuzun Baqallı kəndindən bəhs edib. Müəllif yazıb: “Baqqallıda gözümə bir əzəmətli dağ sataşdı. Sanki içimdən bir səs məni o dağa tərəf çəkib apardı. Dağın zirvəsinə qalxmağa başlamışdım ki, daş parçalarından oyulmuş qapıya rast gəldim. Qapının ağzı hörüklə tikilərək bağlanmışdı. Mən orada başqa qapılara da rast gəldim. Düşündüm ki, görünür dağın içərisində mağaralar olub, sonradan bu mağaraların ağzı bağlanıb. Mən dağa qalxdıqca digər qədim tikililərə də rast gəldim. O dağ qədim tariximizin izlərini özündə yaşadırdı. Dağın zirvəsində isə ən möhkəm qayaların arasında hündürlüyü 6 metrdən artıq olan 3 quyu var idi. Dördüncü quyu isə başqa tərəfdə yerləşirdi və dibi görünmürdü. Bu dağın möcüzəvi quruluşu sanki məni sehrlədiyindən növbəti gün səhərdən axşama qədər dağın ətrafında dolaşdım, dağın üstündəki qədim tikililərə nəzər yetirdim. Mən orada bir neçə şəkil çəkdirdim. Özlüyümdə qərar verdim ki, bu dağda hiss etdiyim qeyri-adiliyi sonadək öyrənməyə çalışacağam. Gərək olsa, bu işə tarixçiləri və digər mütəxəssisləri də cəlb edəcəyəm”.
Baqqallı kəndinin maraqlı bir tarixçəsi var. Barəsində danışılan dağ isə el arasında Koroğlu qalası adlanan yüksəklikdir. Sirli tikilinin də orda olması güman edilir. Əvvəlcə öz sirri və totemləri ilə diqqəti çəkən dağ sonradan xəzinə yuvası kimi dəyərləndirilib. Uzaqdan baxarkən dağın üzərində insan kəlləsi və digər sirli totemlərin (şeytan, mələk başı) cizgiləri əks olunub. Müəllif tərəfindən 500 metr məsafədən çəkilən şəkillərdə başında tac olan qadın, müxtəlif formalı uşaq şəkilləri də öz əksini tapıb.
