ATƏT-in Minsk qrupu Azərbaycan-Ermənistan sərhədində qeydə alınan gərginliklə bağlı açıqlama yayıb.
Modern.az Ermənistan KİV-nə istinadən xəbər verir ki, təşkilat hər iki tərəfi təmkinli olmağa çağırıb.
“Biz tərəfləri sakitliyə və təmkinli olmağa çağırır, təxribatçı addımlardan çəkinməyə və ATƏT-in Minsk qrupunun həmsədrlərinin bayrağı altında tezliklə danışıqlara qayıtmağa çağırırıq”- açıqlamada deyilir.
ABŞ Dövlət Departamenti də sərhəddəki gərginliklə bağlı narahatlığını ifadə edib:
“Biz bir müddət öncə, Yerasx-Sədərək istiqamətində Azərbaycan-Ermənistan sərhədində baş verən insindentdən narahatıq. ABŞ ATƏT-in Minsk qrupunun həmsədri kimi bütün tərəflərlə Dağlıq Qarabağ münaqişəsinin davamlı siyasi həlli üçün səylərinə sadiqdir”.
Qeyd edək ki, ötən gün Ermənistan silahlı qüvvələri Basarkeçər rayonu ərazisindəki mövqelərindən Azərbaycan Ordusunun Ermənistan-Azərbaycan dövlət sərhədinin Kəlbəcər rayonu sahəsindəki mövqelərini atəşə tutub. Qarşı tərəfdən açılan snayper atəşi nəticəsində Beyləqan rayonunun Qəhrəmanlı qəsəbə sakini, 1993-cü il təvəllüdlü gizir Yaqublu Fərman Telman oğlu şəhid olub.
