Հայտնի ամերիկացի հեռուստաաստղ, 46-ամյա Քիմ Քարդաշյանը կարող է այցելել Բաքու։
Modern.az-ը, հղում անելով արտասահմանյան լրատվամիջոցներին, հայտնում է, որ նրա հնարավոր այցը կարող է կապված լինել սեպտեմբերի 24-26-ը Բաքվում կայանալիք Ֆորմուլա 1 Ադրբեջանի Գրան պրիի հետ։ Մրցույթի գլխավոր աստղերից մեկը կլինի Քարդաշյանի սիրելին՝ յոթակի աշխարհի չեմպիոն Լյուիս Հեմիլթոնը։
Քարդաշյանի հետաքրքրությունը Ֆորմուլա 1-ի մրցարշավների նկատմամբ այս տարի հատկապես ուշագրավ է եղել։ Նա հունիսին մեկնել է Մոնակոյի Գրան պրի՝ հենց Հեմիլթոնին աջակցելու համար։ Քարդաշյանը նկատվել է իր քրոջ՝ Քլոեի հետ և աջակցել է Հեմիլթոնին Ferrari-ի ավտոտնակում։ Այդ մրցարշավում Հեմիլթոնը զբաղեցրել է երկրորդ տեղը։ Մրցարշավից հետո բրիտանացի օդաչուն հայտարարել է, որ Քարդաշյանի աջակցությունն իր համար «հիանալի» է եղել։
Քարդաշյանի և Հեմիլթոնի հարաբերությունները նույնպես վերջին ամիսներին ավելի լուրջ բնույթ են ստացել։ Զույգը սկզբում ուշադրության կենտրոնում էր հայտնվել միասին նկարվելով, սակայն հունիսին նրանք բացահայտ ցուցադրեցին իրենց հարաբերությունները սոցիալական ցանցերում։ Այնուհետև միասին արձակուրդ գնալը և ռոմանտիկ լուսանկարներ հրապարակելը ցույց տվեցին, որ նրանց հարաբերությունները շարունակվում են։
Հեմիլթոնի մասնակցությունը Ադրբեջանի Գրան պրիին հաստատված է։ Սակայն դեռևս հայտնի չէ, թե արդյոք Քարդաշյանը կգա Բաքու՝ իր սիրելիին աջակցելու համար։ Ներկայումս դրա վերաբերյալ ոչ Քարդաշյանից, ոչ էլ նրա թիմից պաշտոնական հայտարարություն չի արվել։
Հիշեցնենք, որ Քիմ Քարդաշյանը հայտնի է իր հայամետ դիրքորոշմամբ։
