Ուկրաինայի նախագահ Վոլոդիմիր Զելենսկին չի կարողացել զսպել արցունքները բրիտանացի հեռուստահաղորդավար Սթիվեն Բարթլեթին հարցազրույց տալիս։ Նա խոստովանել է, որ Ուկրաինայում պատերազմի պատճառով ծանր հուզական շրջան է ապրում, ուժեղ լարվածություն է զգում և քնի խնդիրներ ունի։
Modern.az-ը հայտնում է, որ Զելենսկին այս մասին խոսել է «The Diary Of A CEO» փոդքասթում իր ելույթի ժամանակ։
Հարցազրույցի ընթացքում Ուկրաինայի ղեկավարն անդրադարձել է նաև ռազմական գործողությունների դադարեցման հեռանկարներին, Ռուսաստանի հետ հնարավոր բանակցություններին, ԱՄՆ նախագահ Դոնալդ Թրամփի հետ հարաբերություններին և այն փոխզիջումներին, որոնց Կիևը կարող է գնալ հակամարտության կարգավորման համար։
«Ես ուզում եմ, որ իմ երեխաները հպարտանան ինձնով»
Զելենսկին հայտարարել է, որ Ուկրաինայում հակամարտության պատճառով մեծ բարոյական ցավ է զգում և գրեթե չի քնում։
«Դժվար է, որովհետև ես փորձում եմ գոյատևել իմ երկրի և ժողովրդի հետ միասին։ Իսկապես հարց է առաջանում՝ արդյո՞ք վաղը կգա։ Այս հարցի պատասխանն է՝ «այո, կգա»»,- ասել է նա։
Ուկրաինայի նախագահը հավելել է, որ իր երեխաներն իրեն բարոյական աջակցություն են ցուցաբերում։ Նրա ամենամեծ ցանկությունն է, որ իր երեխաները հպարտանան իրենց հորով։
«Սա արդեն մեծ փոխզիջում է»
Զելենսկին ասել է, որ հրադադարի հայտարարումը և բանակցությունների սկիզբն ինքնին մեծ փոխզիջում է համարում։
«Երբ նախագահ Թրամփն ասում է, որ մենք պետք է փոխզիջում գտնենք, հավատացեք ինձ. հրադադարը և բանակցությունների սկիզբն արդեն մեծ փոխզիջում է։ Ատելությունը ոչ մի տեղ չի անհետանա։ Դրա համար ժամանակ և արդարություն է պետք։ Ես բազմիցս փորձել եմ դա բացատրել ԱՄՆ նախագահին. պարզապես հասկացեք մեզ։ Գոյություն ունեցող դիրքերում կանգնելու պատրաստակամությունն ինքնին արդեն մեծ փոխզիջում է»,- ասել է Զելենսկին։
Նա ասել է, որ ուկրաինական զորքերի դուրսբերումը երկրի արևելքից կարող է Ռուսաստանին նոր քաղաքներ գրավելու հնարավորություն տալ։
Վ. Զելենսկու խոսքով՝ Մոսկվան պահանջում է, որ Ուկրաինան լքի Սլավյանսկ, Կրամատորսկ և Դրուժկովկա քաղաքները, միաժամանակ պնդելով Ուկրաինայի զինված ուժերի հետագա դուրսբերումը։
«Եկեք պարզապես դադարեցնենք այս առճակատումը։ Բայց նրանք ուզում են, որ մենք ավելի հետ քաշվենք։ Եթե մենք հետ քաշվենք, որտե՞ղ են անվտանգության երաշխիքները։ Ես նույնիսկ չեմ ասում, որ դա անարդար է»,- ընդգծել է Ուկրաինայի նախագահը։
«Ես ոչ մեկի վրա կրակ չեմ բացի»
Զելենսկին նաև հայտարարել է, որ Թրամփի հետ բազմիցս խոսել է էներգետիկ ենթակառուցվածքների վրա հարձակումները դադարեցնելու մասին։
Նրա խոսքով՝ ինքը ԱՄՆ նախագահից խնդրել է Կիևին հակաօդային պաշտպանության հրթիռներ տրամադրել՝ երկրի էներգետիկ համակարգը պաշտպանելու համար։
Զելենսկին հատուկ ընդգծել է, որ այդ հրթիռները անվճար չի պահանջել։ Նա նշել է, որ մատակարարումների ֆինանսավորումը ստանձնում են եվրոպական երկրները, և դրա վերաբերյալ համապատասխան համաձայնագիր կա։
Սակայն, նրա խոսքով, Ուկրաինային հրթիռների տրամադրումը հետաձգվում է՝ բացատրելով հնարավորությունների սահմանափակությամբ, մինչդեռ Մերձավոր Արևելք մատակարարումները շարունակվում են։
«Տվեք ինձ հակաօդային պաշտպանության հրթիռներ։ Ես ոչ մեկի վրա կրակ չեմ բացի։ Ես կպաշտպանեմ մեր երկրի էներգետիկ ոլորտը»,- ասել է Զելենսկին։
«Սա բոլորովին սխալ տեղեկություն է»
Ուկրաինայի նախագահը հերքել է նաև Դոնալդ Թրամփի մեղադրանքները, թե Ուկրաինայի հարձակումները ռուսական նավթավերամշակման գործարանների վրա բարձրացրել են դիզելային վառելիքի գները ԱՄՆ-ում։
Զելենսկին էներգետիկ շուկայում առաջացած խնդիրների պատճառ է համարել Հորմուզի նեղուցի շրջափակումը։
«Ռուսաստանից դիզելային վառելիքի արտահանման ծավալն այնքան աննշան է, որ դրա ազդեցությունը Միացյալ Նահանգներում գների վրա զրոյական է։ Սա բոլորովին սխալ տեղեկություն է»,- ասել է նա։
Ուկրաինայի ղեկավարն ասել է, որ ռուսական էներգետիկ ենթակառուցվածքների վրա հարվածները հասցվել են ի պատասխան իր երկրի էներգետիկ համակարգի վրա հարձակումների։
«Մենք նաև պատասխան հարվածներ ենք հասցնում նրանց դիզելային վառելիքին»,- նշել է Զելենսկին։
«Եթե Թրամփը նախագահ լիներ, նման բան տեղի չէր ունենա»
Զելենսկին կարծում է, որ Դոնալդ Թրամփը բավականաչափ ազդեցություն ունի Ռուսաստանին բանակցությունների սեղանի շուրջ բերելու համար։ Նա որպես օրինակ է բերել ԱՄՆ Կոնգրեսի կողմից աջակցվող կոշտ պատժամիջոցները։
«Թրամփը շատ հեշտությամբ կարող է Մոսկվային բանակցությունների սեղանի շուրջ նստեցնել։ Նա պետք է այն հռետորաբանությունը կիրառի Ռուսաստանի նախագահ Վլադիմիր Պուտինի նկատմամբ, որը կիրառել է իմ դեմ։ Նրա առջև Ռուսաստանի դեմ պատժամիջոցներ կան։ Այդ պատժամիջոցներին քվեարկել է Կոնգրեսը, ոչ թե նա։ Թրամփը կարող է դրանք կիրառել։ Միգուցե նա Պուտինի հետ հատուկ հարաբերություններ ունի, միգուցե այլ պատճառ կա։ Ես չգիտեմ, թե որն է պատճառը»,- ասել է Ուկրաինայի նախագահը։
Զելենսկին նաև ենթադրել է, որ ԱՄՆ-ում Կոնգրեսի միջանկյալ ընտրությունների նախօրեին Թրամփը կարող է ավելի շատ ուշադրություն դարձնել երկրում էներգակիրների գներին։
Նա նաև ասել է, որ եթե 2022 թվականին ԱՄՆ նախագահը Ջո Բայդենը չլիներ, այլ Դոնալդ Թրամփը, լայնածավալ պատերազմը կարող էր չսկսվել։
«Անկեղծ ասած, կարծում եմ, որ ոչ ոք չգիտի դրա պատասխանը։ Փաստն այն է, որ այս իրադարձությունը տեղի է ունեցել Ջո Բայդենի նախագահության օրոք։ Թրամփի նախագահության օրոք նման բան տեղի չի ունեցել»,- ընդգծել է Զելենսկին։
Ուկրաինայի ղեկավարի կարծիքով՝ Թրամփի բարեկամական հարաբերությունները Պուտինի հետ նույնպես կարող էին կանխել հակամարտությունը։
«Չեմ կարծում, որ նրանք կհամարձակվեն միջուկային զենք կիրառել»
Զելենսկին հայտարարել է, որ չի կարծում, թե Ռուսաստանը կհամարձակվի միջուկային զենք կիրառել։ Նրա կարծիքով՝ նման քայլը կարող է հանգեցնել Մոսկվայի բոլոր դաշնակիցների կորստին և վտանգավոր նախադեպ ստեղծել այլ հակամարտություններում միջուկային զենքի կիրառման համար։
«Բոլորի մտքով անցնում է, որ նրանք կարող են ավելի սարսափելի բան անել։ Բայց ես չեմ կարծում, որ նրանք կհամարձակվեն միջուկային զենք կիրառել»,- ասել է նա։
Զելենսկու կարծիքով՝ միջուկային զենքի մեկանգամյա կիրառումը վտանգավոր նախադեպ կստեղծի նաև այլ միջուկային տերությունների համար։ Սա կարող է մեծացնել նման զենքի կիրառման ռիսկը այլ հակամարտություններում, ներառյալ Մերձավոր Արևելքում։
«Միայն մեր մասնակցությամբ»
Ուկրաինայի նախագահը խոսել է նաև իր երկրի եվրոպական ինտեգրման հեռանկարների մասին։
Նա կարծում է, որ Ուկրաինայի կապերի ամրապնդումը Եվրոպայի հետ կարող է ազդել տարածաշրջանի քաղաքական իրավիճակի և հարևան պետությունների միջև հարաբերությունների վրա։
Զելենսկու խոսքով՝ Ուկրաինայի ղեկավարությունը եվրոպական ուղղությունը համարում է երկրի ապագայի կարևոր բաղադրիչ։
Նա նաև հայտարարել է, որ Ուկրաինայի ապագա ճակատագրի վերաբերյալ ցանկացած համաձայնագիր պետք է ընդունվի երկրի ներկայացուցիչների մասնակցությամբ։
Ա. Գորխմազ
