Ֆրանսիայում ծայրահեղ աջ «Ազգային միավորում» կուսակցության առաջնորդ Մարին Լը Պենի վարկանիշն աճել է բողոքի ակցիաների ֆոնին։
Modern.az-ը հայտնում է, որ այս մասին տեղեկացրել է «Bild»-ը։
Նշվում է, որ Ուկրաինային օգնությունը դադարեցնելու կողմնակից աջակողմյան քաղաքական գործչի վարկանիշը սեպտեմբերի վերջից երեք շաբաթվա ընթացքում 32 տոկոսից հասել է 36 տոկոսի։
Բողոքի ակցիաներին աջակցող արմատական ձախ առաջնորդ Ժան-Լյուկ Մելանշոնի վարկանիշը նույնպես փոքր-ինչ աճել է՝ 16 տոկոսից հասնելով 16,5 տոկոսի։ Նա բարձրացել է երկրորդ հորիզոնական։
Կենտրոնամետ թեկնածուների վարկանիշներում անկում է գրանցվել։ Նախկին վարչապետ Էդուարդ Ֆիլիպի վարկանիշը 14 տոկոսից իջել է 12 տոկոսի։ Մակրոնի կուսակցության թեկնածու Գաբրիել Ատալի վարկանիշը նվազել է մինչև 5 տոկոս։ Ձախ կենտրոնամետ ուժերի ներկայացուցիչ Ռաֆայել Գլյուքսմանը ստանում է 13,5 տոկոս աջակցություն։
Կանխատեսումների համաձայն՝ երկրորդ փուլում Մարին Լը Պենը վստահ հաղթանակ է տանում բոլոր հնարավոր մրցակիցների նկատմամբ։ «Ազգային միավորում» կուսակցության առաջնորդը Ժան-Լյուկ Մելանշոնի դեմ հավաքում է 68 տոկոս, Էդուարդ Ֆիլիպի դեմ՝ 56 տոկոս, Ռաֆայել Գլյուքսմանի դեմ՝ 57 տոկոս, Գաբրիել Ատալի դեմ՝ 58 տոկոս, իսկ Ֆրանսուա Օլանդի դեմ՝ 59 տոկոս ձայն։
