Հավաքական անվտանգության պայմանագրի կազմակերպության (ՀԱՊԿ) գլխավոր քարտուղար Թալաթբեկ Մասադիկովը հայտարարել է, որ Հայաստանը փաստացի դուրս է եկել կազմակերպությունից։
Modern.az-ը հայտնում է, որ նա այս մասին խոսել է ՏԱՍՍ գործակալությանը տված հարցազրույցում։
Թ. Մասադիկովի խոսքով՝ ՀԱՊԿ-ը շարունակում է փաստաթղթեր ուղարկել Հայաստանին, սակայն պաշտոնական Երևանը չի մասնակցում դրանց քննարկմանը և որոշումների կայացմանը։
«ՀԱՊԿ-ը շարունակում է փաստաթղթեր ուղարկել Հայաստանին, սակայն հայկական կողմը չի մասնակցում դրանց քննարկմանը և որոշումների կայացմանը։ Ամեն անգամ մեզ պատասխանում են, որ Հայաստանը չի խոչընդոտում կազմակերպության գործունեությանը և չի առարկում այլ պետությունների կողմից որոշումների կայացմանը։ Այլ կերպ ասած, նրանք չեն խոչընդոտում մեր աշխատանքին։
Նորմալ կառուցվածքային գործընթացը շարունակվում է, և մենք որոշումներ ենք կայացնում։ Նրանք լսում են շաբաթական հաշվետվությունները, սակայն չեն մասնակցում մեր հիմնական միջոցառումներին, զորավարժություններին և այլ գործունեությանը։ Հետևաբար, կարծում եմ, որ այստեղ կարող է կիրառվել ՀԱՊԿ կանոնադրության 25-րդ հոդվածը։ Իրականում նրանք դե ֆակտո արդեն դուրս են եկել կազմակերպությունից»,- ասել է գլխավոր քարտուղարը։
Նշենք, որ ՀԱՊԿ կանոնադրության 25-րդ հոդվածը նախատեսում է համապատասխան երկրի ձայնի իրավունքից զրկում՝ անդամավճարները չվճարելու և քվոտաների գծով պարտավորությունները չկատարելու դեպքում։
Մասադիկովը նաև չի բացառել, որ Հայաստանի՝ կազմակերպությանն անդամակցելու հարցը կարող է բարձրացվել անդամ պետությունների ղեկավարների կողմից նոյեմբերի 11-ին Մոսկվայում կայանալիք Հավաքական անվտանգության խորհրդի նիստում։
Անդրադառնալով Հայաստանի՝ ՀԱՊԿ-ից պաշտոնապես դուրս գալու հնարավորությանը՝ գլխավոր քարտուղարը նշել է, որ եթե հարցը քննարկման դրվի Հավաքական անվտանգության խորհրդի նիստում, ապա կարող է համապատասխան որոշում կայացվել։
Հիշեցնենք, որ Հայաստանի իշխանություններն ավելի վաղ հայտարարել էին ՀԱՊԿ-ին իրենց մասնակցությունը սառեցնելու մասին։ Այնուամենայնիվ, կազմակերպությունից պաշտոնական դուրս գալու ընթացակարգի ավարտը և փաստացի մասնակցության դադարեցումը տարբեր հարցեր են։
