Թուրքիայի և Հայաստանի միջև գտնվող պատմական Անիի կամուրջը կվերակառուցվի:
Modern.az-ը, հղում անելով «TRT Haber»-ին, հայտնում է, որ այս մասին հայտարարել է Թուրքիայի տրանսպորտի և ենթակառուցվածքների նախարար Աբդուլքադիր Ուրալօղլուն։ Նա նշել է, որ կամրջի վերակառուցման մրցույթի գործընթացն ավարտվել է։
Ուրալօղլուի խոսքով՝ կամուրջը գտնվում է Անիում, որը միջնադարի կարևոր առևտրային կենտրոններից էր։ Մետաքսի ճանապարհի վրա 10-րդ դարում կառուցված և մինչ օրս միայն հենասյուները պահպանված պատմական կառույցը կվերականգնվի։
Մետաքսի ճանապարհի վրա որպես մաքսակետ կառուցված կամուրջը դարեր շարունակ եղել է Արևելքի և Արևմուտքի միջև առևտրի կարևոր անցակետերից մեկը։ Նախարարն ընդգծել է կառույցի մեծ նշանակությունը պատմական և մշակութային ժառանգության տեսանկյունից։
Ուրալօղլուն նշել է, որ կամրջի երկարությունը 80 մետր է, իսկ լայնությունը՝ 8 մետր։ Կառույցը գտնվում է այն կետում, որտեղ Ախուրյան գետի հունը նեղանում է մինչև 36 մետր։ Կամրջի 31 մետր թռիչքով կլոր կամարը փլուզվել է 1807 թվականի հոկտեմբերի 16-ին։
Անիի հնագիտական տարածքը, որտեղ գտնվում է նաև Անիի կամուրջը, 21 մշակութային ժառանգության նմուշների հետ միասին 2016 թվականին ընդգրկվել է ՅՈՒՆԵՍԿՕ-ի Համաշխարհային ժառանգության ցանկում։ Ուրալօղլուի խոսքով՝ հիմնական նպատակը պատմական կառույցը պահպանելն ու ապագա սերունդներին փոխանցելն է։
Ուրալօղլուն հայտարարել է, որ Թուրքիայի և Հայաստանի միջև ստորագրված արձանագրության շրջանակներում վերականգնման աշխատանքները կիրականացվեն համատեղ հանձնաժողովի համակարգմամբ։
Կամրջի վերակառուցման աշխատանքների շրջանակն ու մեթոդները սահմանող արձանագրությունը ստորագրվել է Երևանում մայիսի 4-ին։
