Bakıda keçirilən 42-ci Ümumdünya Şahmat Olimpiadası davam edir. Olimpiadada bir çox tanınmış şahmatçılar iştirak edirlər. Keçmiş bakılı, sovet şahmat məktəbinin məşhur siması, eks-dünya çempionu Harri Kasparovun da Bakı Olimpiadasına qonaq qismində qatılacağı söylənilirdi. Amma bu reallaşmadı.

Azərbaycan Şahmat Federasiyasının (AŞF) vitse-prezidenti Mahir Məmmədov Modern.az-a açıqlamasında Kasparovun Bakıya gələ bilməməsi məsələsinə aydınlıq gətirib.

O, bildirib ki, Kasparov Bakıda keçirilən şahmat yarışlarına qonaq qismində dəvət olunmayıb.

“Çünki FİDE-nin rəsmi tədbirlərinə Harri Kasparovun qatılmasına qadağa qoyulub. Hətta, o, FİDE-nin rəsmi tədbirlərində qonaq kimi də iştirak edə bilməz. Biz də Şahmat Federasiyası olaraq Harri Kasparovu Bakıya dəvət etməmişik”.

Qeyd edək ki, Harri Kasparov 1963-cü ildə Bakıda doğulub.1980-ci ildə isə ailəsi ilə birgə Bakını tərk edib. Atası milliyyətçə yəhudi, anası isə ermənidir.

1981-ci ildə şahmat üzrə SSRİ çempionu adını qazanaraq Sovet şahmat tarixində buna nail olan ən gənc şahmatçı olub.

 
Namidə BİNGÖL