(İçsəs)
İnsan yaşamda həzz axtarır.
***
Yalnız mənalıda həzz var. Mənasızda ağrı-acı, iztirab var.
***
Mənalı həzz – ruhanidir, mənasız həzz – qeyri-ruhanidir.
***
Bizi dünyaya, yaşama inandıran – mənalı həzlərdir.
***
İçki, uyuşdurucu ilə həzz alırlar, ona görə iztiraba düşürlər: ruhani tələbatı qeyri-ruhani yolla ödəyirlər.
***
Daha çox pul qazanan – daha çox həzz əldə etmək istəyəndir.
***
Ləyaqətdən keçən üçün çox pul qazanmaq – həzzdir.
***
Ləyaqətli üçün gərəkəndən artıq pul qazanmaq – ağrı-acı, iztirabdır.
***
Varlı olmaq – yaşamda başqalarından daha çox həzz almaq istəyidr.
***
Başqasını yoxsul etmək – yaşam həzzindən məhrum etməkdir, ona iztirab yaşatmaqdır.
***
Varlı – yaşamda insana həzz verən maddi hər şeyi pulla əldə edə bilir.
***
İnsan yalnız maddini almır – maddidəki həzzi satın alır.
***
İnsan əslində maddiyə olan tələbatını ödəmir – maddidəki həzzə olan tələbatını ödəyir.
***
İnsanın ruhani fəaliyyətinin başlıca məqsədi – məna yaratmaqdır.
***
Yaşamımızı gözəl, şəraitimizi rahat istəyirik – bizə həzz versin.
***
İnsanın yaşamda başlıca məqsədi – ruhani həzzə yetməkdir, iztirabı yox etməkdir.
***
Yalnız yaşama, dünyaya idraki, ruhani yanaşma insanı doğruçu həzzə çatdırır.
***
Yaşama, dünyaya qeyri-ruhani yanaşma – insanı ağrı-acıya salır.
***
Bütün ruhani həzzlərin arxasında insani fəaliyyət dayanır.
***
Bütün iztirabların arxasında antiinsani fəaliyyət dayanır.
