Argentina millisi dünya çempionatının yarımfinalında İngiltərəni 2:1 hesabı ilə məğlub edərək finala yüksəldi. Bu nəticədən sonra futbolsevərlər arasında yenidən bir ad tez-tez xatırlandı. Tofiq Bəhrəmov.
Modern.az xatırladır ki, dünya futbol tarixinin ən məşhur hakimlərindən biri hesab olunan azərbaycanlı Tofiq Bəhrəmov 1966-cı ildə İngiltərədə keçirilən dünya çempionatının finalında yan xətt hakimi olub.
İngiltərə ilə Almaniya arasında oynanılan həlledici görüşün əlavə vaxtında Ceff Herstin zərbəsindən sonra top qapının tirinə dəyərək aşağı düşüb və meydançaya qayıdıb. Baş hakim , isveçrəli Qotfrid Dinst epizodu müəyyənləşdirmək üçün yan xətt hakimi Tofiq Bəhrəmova müraciət edib. Azərbaycanlı hakim topun qapı xəttini keçdiyini göstərib və qol qeydə alınıb. Həmin qarşılaşma İngiltərənin 4:2 hesablı qələbəsi və tarixində yeganə dünya çempionluğu ilə nəticələnib.
Bu epizod sonradan futbol tarixində “Uembli qolu” (Wembley Goal) kimi məşhurlaşıb. Aradan təxminən altı onillik keçməsinə baxmayaraq, həmin qərar hələ də futbol tarixinin ən çox müzakirə olunan hakim qərarlarından biri sayılır.
Tofiq Bəhrəmovun adı bu hadisədən sonra dünya futbolunda xüsusi yer tutub. Bakıda yerləşən Respublika Stadionuna onun adı verilib, stadionun qarşısında isə əfsanəvi hakimin abidəsi ucaldılıb.
